जशपुर। जशपुर के पत्थलगांव विकासखंड के माध्यमिक शाला कर्राजोर अउ प्राथमिक शाला मुडाबहला क्षेत्र ल अवइया 28 दिन बर कन्टेनमेंट जोन घोसित कर दे हाबे। एजेंसी ले मिले आरो के मुताबिक जिला कलेक्टर महादेव कावरे के निर्देश म नोवल कोराना वायरस कोविड-19 के संक्रमण के रोकथाम खातिर 28 दिन बर स्वास्थ्यगत आपातकालिन परिस्थिति ल छोड़के उहां अवई-जवई पूरा बंद रइही। कन्टेनमेंट क्षेत्र के रहइया मन बिगर सक्षम अधिकारी के अनुमति के अपन घर ले बाहिर तको नी निकले। जानबा होवय के पाछू दिन जशपुर जिला ले 16 कोरोना के मरीज मिलिस जेकर मेडिकल कॉलेज अस्पताल अंबिकापुर म इलाज चलत हाबे। अइसने फरसाबहार विकासखंड के पंचायत क्वारेंटाईन सेंटर माध्यमिक शाला खुटगांव के परिसर ल तको 28 दिन बर कन्टेनमेंट जोन घोसित करे गे हाबे। कन्टेनमेंट जोन म कानून व्यवस्था अउ आन देखरेख खातिर संबंधित अधिकारी अनुविभागीय अधिकारी राजस्व, पुलिस प्रशासन, लोकनिर्माण विभाग, सीईओ जनपद पंचायत अउ विकासखंड शिक्षा अधिकारी उक मनके नियुक्ति करे गे हाबे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।