एन माही फिल्म प्रोडकशन के बैनर म बने छत्तीसगढ़ी हास्य फिलिम 3 ठन भोकवा रिटर्न्स जो कि 3 ठन भोकवा के सीक्वल आए। ये फिलिम के निर्माता हावे मोहित साहू जेन मोर जोड़ीदार, मोर जोड़ीदार 2 अउ लव दीवाना जइसन एक्शन अउ रोमांस फिलिम बनाये रिहिसे। निर्देशक उही
शर्मा सिंह बघेल यानी 3 ठन भोकवा वाले न्यायधानी बिलासपुर के जबरदस्त कलाकार अउ निर्देशक अनुपम भार्गव आए। लॉकडाउन के सेती फिलिम सिनेमाघर म भले नी आवत हाबे लेकिन कलाकार मन आम दर्शक के मनोरंजन के पूरा ख्याल राखत बेरा-बेरा म सोशल मीडिया म आते रिथे।
सोशल मीडिया कोति ले आरो मिले हाबे के 3 ठन भोकवा रिटर्न्स के पहिली मया भरे गीत लांग ड्राइव 12 मई दिन मंगलवार के बिहनिया 7 बजे ले एन माही यूट्यूब चैनल म देखे बर मिलही। जानबा होवय के ये फिलिम म छॉलीवुड के युवा खलनायक क्रांति दीक्षित हीरो के किरदार म नजर आही। क्रांति येमा सरपंच के लइका के भूमिका म हाबे अउ ओकर संग अभिनेत्री सीमा सिंह ह माधुरी के किरदार म नजर आही। लागथे दूनो के मया के लफड़ा-झपड़ा म शानदार रोमांस अउ धारदार हास्य देखे बर मिलही।
जइसे के ये फिलिम 3 ठन भोकवा के सीक्वल आए तव अनुपम भार्गव शर्मा सिंह बघेल, मनोहर यादव भांचा, अमित चक्रवर्ती मन्नू रंगीला, नीतिका भार्गव वैजयंती माला, लतीश भांगे पप्पू, शैलेंद्र भट्ट चोवा फ्रॉम मोवा मन के भारी हास्य अउ गुदगुदी तो देखे बर मिलबेच करही। निर्देशक अनुपम भार्गव के मुताबिक ये फिलिम तो अऊ बेदम मजा देही, ये दरी दर्शक मन सिरिफ पेट धरके हांसही भर नही भलूक घोलंड-घोलंड के कठलहीं।
