नइ भुलावे जोगी... तोला छत्तीसगढ़ के माटी

रायपुर। छत्तीसगढ़ के प्रथम मुख्यमंत्री अजीत जोगी जी अब ए दुनिया म नइ रि‍हिस। जोगी के तबीयत पाछू कुछ दिन ले बने नी रिहिसे। ओमन अस्पताल म अपन आखरी सांस लीस। ये बात के जानकारी देवत उंकर लइका अमित जोगी ल बताइन के श्री जोगी के अंतिम संस्कार उंकर जनम भुइंया गौरेला म काली 30 मई के करे जाही। 

जोगी जी के नइ रेहे के आरो पाते ही देश के राष्ट्रपति, प्रधानमंत्री संग देशभर बड़का नेता मनके अलावा प्रदेश के मुख्यामंत्री भूपेश बघेल संग सरी छत्तीसगढ़ उंकर सुरता करत श्रद्धांजलि अर्पित करे हाबे। नानपन ले गजब होनहार बेटा ह गरीब परिवार ले उठके देश के सबले बड़का पद म बइठिस इही जबर बात आए जेन ल लोगन कभू नी भुलवाए। 

29 अप्रैल 1946 के जनम लेवइया श्री जोगी ह इंजीनियरिंग के पढ़ई करे बाद शिक्षक के रूप म अपन नवजीवन के सुरूआत करिन। अपन लगन अउ मेहनत ले आई.पी.एस. अउ आई.ए.एस. के रूप म अविभाजित मध्यप्रदेश के कई जिला म कलेक्टर तको रिहिन। नौकरी के बाद ओमन राजनीति म आइस अउ सांसद, विधायक बनिस। सबले बड़का दिन एक नवंबर 2000 के आइस जब ओमन छत्तीसगढ़ राज्य के पहिली मुख्यमंत्री बनिस।

श्री जोगी के निधन म प्रदेश सरकार ह तीन दिन के राजकीय शोक घोषित करे हाबे। प्रदेश के मुखिया ह ये बात के आरो देवत किहिन के छत्तीसगढ़ बर अपूरणीय क्षति आए। उंकरे सोच अउ परिकल्पना ले ही छत्तीसगढ़ राज्य के लघियात विकास के रूपरेखा बनिस अउ एक कुशल राजनीतिज्ञ, प्रशासक के रूप म ओमन राज्य ल आगू बढ़ाये म जबर योगदान दीस।