भारतीय सिनेमा म सबले जादा योगदान देने वाला परिवार के एक अउ दीया आज भुतागे। बड़का कलाकार निर्देशक राज कपूर जी के लइका अउ पृथ्वीराज कपूर के नाती ऋषि कपूर 30 अप्रेल 2020 के आखरी सांस लीस। 4 सितंबर 1952 के मुंबई म जन्मे ऋषि कपूर एक महान कलाकार, फ़िल्म निर्माता अउ निर्देशक रिहिसे।
उंकर कला जीवन के शुरूआत नानपन ले फिलिम 'मेरा नाम जोकर' ले होगे रिहिसे। लोगन उनला जानिस फिलिम बॉबी ले जेमा जबर कलाकारी के सेती ऋषि ल सर्वश्रेष्ठ अभिनेता अउ फ़िल्मफ़ेयर पुरस्कार मिलिस। 1973 ले अब तक ओमन लगभग 100 ले आगर फिलिम म प्रमुख भूमिका निभाए हाबे। ऋषि कपूर अपन पाछू पत्नी नीतू सिंह (अभिऩेत्री), बेटा रणबीर कपूर (अभिनेता), बेटी रिदीमा कपूर (ड्रैस डिजाइर) के संग करोड़ों मया करइया दर्शक छोड़के चल दिस।
ऋषि कपूर जी के फिल्मी सफरनामा-
मेरा नाम जोकर, बॉबी, यादों की बारात, जहरीला इंसान, रफ़ू चक्कर, लैला मज़नू, बारूद, अमर अकबर एन्थोनी, बदलते रिश्ते, सरगम, कर्ज़, दो प्रेमी, जमाने को दिखाना है, प्रेम रोग, राही बदल गये, तवायफ़, नगीना, एक चादर मैली सी, हवालात, खुदगर्ज़, चाँदनी, बड़े घर की बेटी, हिना, दीवाना, बोल राधा बोल, हनीमून, इज़्ज़त की रोटी, साहिबाँ, साधना, दामिनी, ईना मीना डीका, साजन का घर, हम दोनों, साजन की बाहों में जइसन लगभग 125 फिलिम ओकर सुरता ल तइहा जुग तक अम्मर राखे रइही।