प्रदेश के मुखिया भूपेश बघेल ह महिला अउ बाल विकास मंत्री के संग आंगनबाड़ी के लइका मन के समग्र विकास खातिर यूनिसेफ के सहयोग ले तइयार चकमक अउ सजग कार्यक्रम के बेव लांचिंग करिन।
आंगनबाड़ी के लइका मन चकमक अभियान ले पारिवारिक सदस्य मन संग रचनात्मक गतिविधी सिखही येकर अलावा सजग कार्यक्रम ले स्वास्थ्य, पोषण ल बढ़ावा दे जाही। लॉकडाउन के बेरा म आंगनबाड़ी कार्यकर्ता मन घरों-घर जाके ये कार्यकम के गीतिविधी ल बताही। ये मउका म मुख्यमंत्री श्री भूपेश बघेल ह हल्बी अउ गोंडी के पुस्तक ‘मोद्दोल डाका’, ‘पहिल डांहका’ अऊ विकासखंडवार नक्शा के विमोचन तको करिन। श्री बघेल के अलावा श्रीमती अनिला भेंड़िया, सिद्धार्थ कोमल सिंह परदेशी, जन्मेजय महोबे, यूनिसेफ फील्ड प्रमुख जोब जकारिया के उपस्थिति म दंतेवाड़ा के बिंजाम गांव के कविता अनुसुईया संग उंकर पालक श्रीमती ललिता नेताम, श्रीमती राजो बाई नेताम ले वीडियो कॉफ्रेन्सम म गोठबात करिन।
ये मउका म महिला बाल विकास मंत्री श्रीमती अनिला भेंड़िया ह बताइन के चकमक अभियान लइका मनके अभिव्यक्ति के एक महत्वपूर्ण मंच आए, पूरा परिवार संग हंसी-खुशी ले सीखे सीखये के अवसर मिलही। सजग कार्यक्रम म कार्यकर्ता मन मोबाइल ले ऑडियो मेसेज म लइका मनके बने परवरिश के सुझाव, गतिविधी संबंधी कहानी, गीत भेजत हाबे। यूनिसेफ के भारत प्रमुख सुश्री यास्मिन अली हक ह प्रदेश के मुख्यमंत्री श्री भूपेश बघेल के अगुवई म छत्तीसगढ़ प्रदेश म कोविड-19 के बचाव अउ रोकथाम के बुता ल सहराइन। ओमन आगू किहिन के छत्तीसगढ़ के नवाचार मॉडल पूरा देश म उदाहरण बनही।