- मुख्यमंत्री अउ संस्कृति मंत्री ह लीस संस्कृति विभाग के अधिकारी मनके बइठ
- कला अउ कलाकार मनके हित बर कला परिषद् बनाये के विचार
अंजोर.ए। छत्तीसगढ़ के मुखिया माननीय भूपेश बघेल अउ राज के संस्कृति मंत्री ताम्रध्वज साहू ह महानदी भवन मंत्रालय म संस्कृति, धर्मस्व अउ धार्मिक न्यास, पुरातत्व अउ पर्यटन विभाग के काम काज के समीक्षा करिन। ये मउका म छत्तीसगढ़ के संस्कृति के प्रचार-प्रसार म जोर दे गिस अउ छत्तीसगढ़ के कला अउ कलाकार मनला बढ़ावा दे खातिर कलाकार परिषद बनाये के विचार-विमर्श तको करे गिस। छत्तीसगढ़ के संस्कृति के प्रचार-प्रसार खातिर बने होम के काम करे खातिर हरेक बच्छर एक थीम बनाके काम करे बर गुनान करिन। बइठका म संस्कृति मंत्री ह बताइन के राज म धर्मस्व अउ धार्मिक न्यास के कोनो सेटअप नइये जेकर बर संस्कृति, धर्मस्व अउ धार्मिक न्यास के संघरे सेटअप बनाए बर तको विचार मंथन करे गिस।
बइठका म अपन बात रखत मंत्री जी कहिन के छत्तीसगढ़ के लोक कलाकार, साहित्यकार, छत्तीसगढ़ी फिल्म के निर्माता, निर्देशक अउ फिल्मी कलाकार ले मुलाकात के बाद कला संस्कृति के विकास खातिर कार्ययोजना ल सुझाव के आधार म बनाये जाही।येकर अलावा जइसन गढ़कलेवा छत्तीसगढ़ी व्यंजन के प्रचार-प्रसार अउ बढ़ावा खातिर संस्कृति विभाग परिसर बने हावय अइसने गढ़कलेवा राज्य के सबो जिला मुख्यालय म बनाये जाही। संगे-संग छत्तीसगढ़ हाट असन बस्तर अउ सरगुजा हाट तको बनाये जाही।
बइठका म मुख्यमंत्री ह महात्मा गांधी के 150वीं जयंती म आयोजित होवइया कार्यक्रम के जानकारी मांगिस जेन म विभाग के अधिकारी मन बताइन के गांधी फाउण्डेशन के सहयोग ले अवइया महीना म संगोष्ठी के आयोजन करे जाही, जेमा छत्तीसगढ़ के विभूति मनके जानकारी लोगन ल दिये जाही। राज्य के ग्रामीण अंचल म होवइया मेला-मड़ई के प्रचार-प्रसार बर तको जोर दे जाही राज म 73 मेला, उत्सव अउ महोत्सव होथे जेकर बर दो करोड़ रूपए 46 लाख रूपिया के अनुदान दिया जाथे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।