भूपेश सरकार ले लोगन ल चिटफंड के पइसा के आस
जिला अउ तहसील स्तर म बनही निवेशक सुविधा केंद्र
अंजोर ए.। छत्तीसगढ़ के लोगन मन भारी सिधवा होथे ये बात के फायदा उठावत चिटफंड कंपनी ह स्थानीय बेरोजगार युवा मन सबले पहिली अपन सिकार बनाइस अऊ ओमन ल मोटा कमीसन अउ आनी-बानी के लालच देके। गरीब किसान मन ले अपन कंपनी म पइसा जमा करवाइन। किसान बनिहार मन अपन मेहनत के कमई ल कंपनी के स्कीम देखके लगा दिस फेर जब रकम वापसी के बेरा आइस तो कंपनी अपन बोरिया बिस्तार बांध के भगागे।
कतकोन कंपनी के मालिक मन अभी तक इही पाके जेल म हावय। अऊ कतकोन कंपनी म काम करइया कार्यकर्ता मन तको सजा भोगत हावय। कंपनी के दोगलई ल का जानय इहां के आम लोगन मन फेर शासन प्रशासन ह तो जानत रिहिस हावय के फलाना कंपनी ह फर्जी हावय किके। वहू बिना कोनो जांच के कंपनी ल चलवावत रिहीस। सरकार कहात हे कंपनी फर्जी हावय तब ये बात ल ऊही दिन कहना रिहिस जेन दिन ये कंपनी ऑफिस तान के बइठीस।
अइसन सब बात आज चिटफंड कंपनी कार्यकर्ता अउ निवेशक मन म होवत हावय। येदे भूपेश दाउ के सरकार के आए ले कुछ काम आगू सरकत दिखत हावय। ओमन पूरा पूरा कार्यकर्ता मनके संग हावय अउ पइसा लहुटाय कोति काम तको करे के सुरू कर दे हावय। ये संबंध म चिटफंड कंपनी पीएसीएल के निवेशक मन के मदद खातिर जिला स्तर के सुविधा केंद्र खोले जाही जेन म ओमन ल ऑनलाईन आवेदन फॉर्म निःशुल्क भरवाए के सुविधा तको रइही।
जानकारी के मुताबिक धमतरी बर कलेक्टर रजत बंसल ह डिप्टी कलेक्टर एच.एल. गायकवाड़ ल नोडल अधिकारी बनाये हावय अउ तकनीकी सहायता के प्रबंधक ई गवर्नेंस सोसायटी शब्बीर खान ल तकनीकी अधिकारी अउ सह मास्टर ट्रेनर बनाये हावय। जनपद स्तर म तको निवेशक मन बर ऑनलाईन आवेदन फॉर्म भराये के सुविधा रइही। कंपनी ले रकम वापसी खातिर फार्म ऑनलाइन 1 मार्च ले 30 अप्रेल तक भरे जाही।
