मातर तिहार : छत्तीसगढ़ के लोकजीवन, खोड़हर देव के पूजा, राउत नाचा अऊ अखाड़ा के अनोखा उत्सव

"अरा ररा भाई रे...! सिरिफ दिया जलाए के नइ, बल्कि गऊ माता, प्रकृति आऊ लोक देवता ल जोहार करे के तिहार आय हमर 'मातर'। पढ़व छत्तीसगढ़ के माटी ले जुड़े ये जबर तिहार के पूरा महत्ता आऊ इतिहास!"

मातर तिहार : छत्तीसगढ़ के लोकजीवन के उत्सव, जिहां गड़वा बाजा के थाप म झूमथे आस्था अऊ परंपरा

रायपुर। हमर छत्तीसगढ़ के संस्कृति ह देखन म जतका सीधा अऊ सरल लागथे, अपन भीतर म ओतकेच गहिराई ल समेटे हुए हे। इहां के हर एक तिहार-बार, हर एक लोकाचार ह प्रकृति अऊ मनखे के जिनगी (लोकजीवन) के बीच के गहिरा गोठ-बात के प्रतीक आय। दीपावली ल हमर छत्तीसगढ़ म बड़े मया ले 'देवारी' कहे जाथे। देवारी के तिहार ह जिहां पूरा भारत देस म माता लक्ष्मी के पूजा आऊ धन-दौलत के आराधना के रूप म मनाए जाथे, उहें छत्तीसगढ़ के पावन भुइंया म ये तिहार ह अपन बिल्कुल आनेच अउ अनोखा रंग म झूम उठथे।

छत्तीसगढ़ म देवारी ह सिरिफ उजियार (रोशनी) अऊ रूपिया-पइसा के तिहार नोहय, बल्कि ये ह हमर लोक देवी-देवता आऊ पशुधन (गरूआ) के प्रति आभार (कृतज्ञता) जताए के महापर्व आय। देवारी ह छत्तीसगढ़ के लोकजीवन म तीन दिन तक चलइया एक ठन अब्बड़ भव्य उत्सव होथे। देवारी के रतिहा जब चारों मुड़ा माटी के दिया मन टिमटिमावत रहिथें, ठीक ओही बेरा म छत्तीसगढ़ के गांव-गंवई म सुरू होथे 'सुरहुति तिहार', जेला ईसर-गौरा के बिहाव उत्सव यानी भगवान शंकर आऊ माता पार्वती के पवित्र मिलन के दिन माने जाथे। ओखर दूसर दिन गोवर्धन पूजा होथे, अऊ ठीक ओखर बाद आथे छत्तीसगढ़ के सबले अद्भुत अऊ जोश भरे लोकपर्व- 'मातर'।

‘मातर’ सब्द के का हे अरथ अऊ भाव? समझव येखर गहिराई ल

छत्तीसगढ़ म जागृत देव के परंपरा हे, इहां के कण-कण म देवता मन के बास हे अऊ ये ह शक्ति के केंद्र आय, जउन ह एक तय तिथि म परगट होथे। जानकार अऊ सियान मन के मानना हे कि ‘मातर’ सब्द ह अपन आप म अब्बड़ गहिरा अरथ रखे हे। येमा ‘मा’ के अरथ होथे 'माता', अऊ ‘तर’ के अरथ होथे 'ओखर शक्ति या ऊर्जा ल जगाना (जागृत करना)'। मातर तिहार के मूल भाव हे- अन्न माता, धरती दाई, पशुधन (गाय-गरूआ) अऊ गांव के लोक देवता मन के आगू माथा नवा के आभार जताना अऊ ओमन ले सबके रक्षा के कामना करना।

छत्तीसगढ़ के लोकसंस्कृति म ‘मातर’ ह कोनो एक ठन देवी के नाव नोहय, बल्कि ये ह लोक उत्सव के वो पबितर भावना आय, जउन ह शक्ति रूप म धरती ले लेके घर के अंगना तक, कोठी के अन्न ले लेके कोठा के पशुधन तक सबो म समाए हुए हे।

यादव (राउत) समाज के प्रमुख लोकपर्व आऊ गाय-गरूआ के सिंगार

मातर ह मुख्य रूप ले हमर यादव समाज (राउत, ठेठवार, पहटिया आदि) के सबले बड़े अऊ प्रमुख लोकपर्व आय। राउत समाज के पूरा जिनगी ह पशुधन, खास करके गाय, भइसी-भइसा अऊ छेरी-बठरू मन ले गहिराई ले जुड़े रहिथे। इही कारन हे कि मातर के दिन गाय-भइसी मन ल अब्बड़ मया ले सजाए जाथे, ओमन के पूजा करे जाथे अऊ बछर भर हमर सेवा करे बर ओमन के आभार परगट करे जाथे।

मातर के दिन बिहनिया ले ही पूरा गांव के माहौल ह रंग अऊ उत्साह ले भर जाथे। गांव के राउत भाई मन अपन पारंपरिक पोशाक- मुड़ म रंग-बिरंगी पगड़ी, कनिहा म अंगोछा, हाथ म फुलेता धरके नाच-गान करे बर तइयार हो जाथें। गाय-भइसी मन ल नहवाए-धोवाए जाथे, ओमन के गला म सुंदर सोहाई (फूल, मयूर पांख अऊ दुहर के माला) पहिराए जाथे, अऊ नवा धान के चाउर ले बने कलेवा बनाके ओमन ल खवाए जाथे। घर के माईलोगिन मन घर-अंगना म दिया सजाथें। राउत घर के माईलोगिन मन गांव के घर-घर म जाके ओरी लिपथे, गोबर अऊ चाउर पिठ्ठी के हाथा देए जाथें, अऊ गांव के दाऊ-ठाकुर मन के घर म अन्न-धन ले भरे रहे के आसीस देके आथें।

दइहान म ‘खोड़हर देव’ के स्थापना: लोकदेवता के प्रतीक

मातर तिहार के सबले बड़े बिसेसता हे- ‘खोड़हर’ देव के स्थापना। गांव के दइहान (जिहां गांव भर के गाय-गरूआ मन इकट्ठा होथें) म काठ (लकड़ी) ले बने एक ठन बिसेस आकृति ल स्थापित करे जाथे, जेला ‘खेड़हर’ कहे जाथे। ये ह कोनो मूरत पूजा जइसन नइ होवय, बल्कि येला एक ठन प्रतीकात्मक लोक देवता के रूप म माने जाथे- जउन ह गांव के पशुधन, खेती-खार के भुइंया अऊ फसल के रक्षा करथे।

ठेठवार मन के घर ले दइहान डहर गांव के मुखिया आऊ सियान मन गाजा-बाजा के संग खुड़हर, महेरी, सोहाई, दूध आदि ल धरके रेंगथें। पूरा गांव के मनखे मन दइहान म जुरिया के (इकट्ठा होके) ‘खोड़हर देव’ के विधि-विधान ले पूजा करथें। इही वो सुग्घर बेरा होथे, जब पूरा समाज ह एक संग मिलके प्रकृति अऊ जिनगी के प्रति अपन आभार परगट करथे। काबर कि यादव समाज के मनखे मन मूल रूप ले पशुपालक होथें, त ओमन के घर ले दइहान म परसाद के रूप म बांटे बर कांवर भर-भर के दूध के खीर अऊ महेरी लाए जाथे। पूरा गांव म एकता अऊ भाईचारा के संग दइहान म बइठ के दूध-खीर ल परसाद के रूप म बांटे अऊ खाए जाथे।

राउत नाचा: लोकभावना आऊ उत्साह के जीवंत रूप

मातर उत्सव के मजा ह बिना राउत नाचा के अधूरा रहिथे। दइहान अऊ गांव के गली ले दूरिहा ले ही सुनई देवइया ‘अरा ररा भाई रे...’ के किलकारी ह मनखे के मन म अपन आप जोश अऊ उमंग भर देथे। ये नाचा ह सिरिफ मनोरंजन के साधन नोहय, बल्कि ये ह समाज के एकता, अनुशासन आऊ मिहनत (श्रम) के प्रति सम्मान के प्रतीक आय। गांव के युवक मन जोड़ी बनाके, हाथ म फुलेता अऊ गोड़ म घुंघरू बांध के गड़वा बाजा के सुग्घर ताल म झूम-झूम के नाचथें।

राउत नाचा के दोहा मन म अपन पुरखा के परंपरा के गान, वीरता (शौर्य) के प्रदर्शन, सामाजिक संदेस, धार्मिकता, हांसी-ठिठोली अऊ आपसी भाईचारा के खास झलक दिखथे। जब राउत मन एक सुर म दोहा पारथें (गाथें), त लागथे मानो हवा घलो थम गे हे-

पान खायेन सुपारी मालिक, सुपारी के दुई कोर।

म तो बइठो रंगमहल में, जोहार लेवव मोर॥

अवत दिएन गारी गोढ़ा, जावत दिएन असीस।

दूधे खाव पूते बिहाव, जीयव लाख बरीस॥

राउत मन के ये दोहा म छत्तीसगढ़ के लोकजीवन के सच्चाई, मया आऊ आसीस ह साफ झलकथे। ये ह मया अऊ सम्मान के अइसन गोठ-बात आय, जिहां मयारू गारी ह घलो लाख बरीस जिए के आसीस बन जाथे।

अखाड़ा : शौर्य अऊ शस्त्र कला के जबर प्रदर्शन

हमर यादव समाज ह एक डहर जिहां पशुपालक के रूप म अपन परंपरा ल निभावत हे, उहें दूसर डहर ओमन शस्त्र विद्या (हथियार चलाए के कला) म घलो पूरा निपुण होथें। लाठी ह ओमन के सबले प्रमुख अस्त्र-शस्त्र आय। गाय-गरूआ चराए के बेरा म ओमन ल घना जंगल-झाड़ी म जाए ल परथे, जिहां ओमन के सामना ह खूंखार जंगली जानवर, बघवा-भालू अऊ चोरहा-लुटेरा मन ले होवत रहिथे। अइसन बेरा म ओमन अपन अऊ अपन गाय-गरूआ के जान-माल के रक्षा ह इही स्वयं सिद्ध 'अखाड़ा कला' के माध्यम ले करथें।

आजकाल अखाड़ा म लाठी के संग-संग फरसा, तलवार, भंवरा, बरछा, कटारी अऊ हिरण सींग जइसन पारंपरिक हथियार मन घलो सामिल हो चुके हें। सबले खुसी के बात ये हे कि अखाड़ा के ये पुरखौती कला ल अब सिरिफ यादव समाज नइ, बल्कि गांव के आने समाज के युवा मन घलो सीखत हें अऊ येखर प्रदर्शन करत हें। आज गांव-गांव म अखाड़ा दल बने हे, जउन मन मातर तिहार के मउका म सामूहिक रूप ले अपन शौर्य अऊ हैरतअंगेज कला के परदरसन करथें।

मातर म अखाड़ा देखई ह सबले खास आकर्षण होथे, जेला देखे बर तीर-तखार के गांव के हजारों मनखे मन जुरियाथें। मातर के ये उत्सव ह मझंनिया (दोपहर) ले सुरू होके संझा तक चलथे, अऊ अब गांव-गांव म बिजली के चकाचौंध रोशनी होए के सेती लोगन मन आधा रतिहा तक अखाड़ा के भरपूर आनंद लेथें। मातर के दिन कतकोन गांव म 'मड़ई मेला' के आयोजन घलो होथे। दिनभर मेला-मड़ई के आनंद अऊ रतिहा बेरा म छत्तीसगढ़ी नाचा-गम्मत (नाच-पेखन) के आयोजन ह देवारी अऊ मातर तिहार के रौनक ल लाख गुना बढ़ा देथे।

अंजोर:छत्तीसगढ़ी समाचार, 

संपादक/अनुवादक-जयंत साहू 9826753304