मातर के दिन अखड़ा डाड़ म अखाड़ा के जबर परदरसन: तन-मन के शक्ति अऊ पुरखौती कला देख के मोहा जाथे मन

रायपुर/छत्तीसगढ़। हमर छत्तीसगढ़ के पावन माटी म देवारी ह सिरिफ एक दिन के तिहार नोहय, बल्कि ये ह खुसी, उच्छाह अऊ भाईचारा के कई दिन तक चलइया महाउत्सव आय। देवारी के सुरहुत्ती, गोबरधन पूजा, ईसर-गौरा के बिहाव अऊ ओखर बाद आथे सबले जोश भरे तिहार- 'मातर'। मातर के दिन गांव के अखड़ा डाड़ (मैदान) म जब अखाड़ा के परदरसन होथे, त सिरतोन म वो नजारा ह देखेइया मन के मन ल पूरा तरह ले मोह लेथे।

दुरिहा गांव ले जुरियाथें पहुना, मइके आथें बिहाता नोनी मन

मातर तिहार के दिन गांव के रौनक ह देखत बनथे। अखड़ा डाड़ म अखाड़ा के हैरतअंगेज खेल देखे बर सिरिफ गांव के मनखेच मन नइ, बल्कि दुरिहा-दुरिहा के गांव ले हजारों देखइया मन जुरियाथें। ये तिहार के मउका म घर-परिवार के जम्मो लाग-मानि अऊ सगा-सोदर मन एक जघा सकलाथें। सबले सुग्घर बात ये हे कि ससुराल गे बिहाता नोनी मन घलो खास करके मातर देखे अऊ अपन दाई-ददा, भाई-बहिनी ले भेंट करे खातिर अपन मइके आथें। पूरा गांव म मेला-मड़ई जइसन खुसी के माहौल छाए रहिथे।

तन-मन के शक्ति के परदरसन आय मातर के अखाड़ा

मातर आऊ अखाड़ा ह हमर छत्तीसगढ़ के एक ठन अइसन पुरखौती बिदिया (विद्या) आय, जेमा मनखे के तन अऊ मन, दूनो के अद्भुत शक्ति अऊ एकाग्रता के परदरसन होथे। गांव के सियान अऊ उस्ताद मन ह मातर म अखाड़ा के परदरसन करे के तइयारी ल कतकोन दिन आगू ले ही सुरू कर दे रहिथें। गांव के जवान-लइका मन ल लाउठी, बाना, बनेठी, भाला चलाए के गुन सिखाए जाथे। मातर के दिन अखड़ा डाड़ म उतर के ओमन अपन इही पुरखौती कला अऊ वीरता के जबर परदरसन करथें। गड़वा बाजा के थाप अऊ अखाड़ा के पैंतरा ह देखेइया मन के रोंगटा खड़ा कर देथे।

अखाड़ा म का-का होथे? संगवारी हो, तुमन घलो देवव अपन जानकारी!

अखाड़ा के परदरसन म का-का करतब होथे- ये फोटो मन के संग पूरा विस्तार ले जानकारी ल मैं तुमन के आगू बाद म परोसहूं, काबर कि आज त मैं खुद गांव के अखड़ा डाड़ म मातर अऊ अखाड़ा देखे म पूरा मगन हंव!

त संगवारी हो, जब तक मैं मातर के आनंद लेवत हंव, तुमन कमेंट बॉक्स म ये जरूर बताहू कि तुमन मातर तिहार अऊ अखाड़ा के बारे म अऊ का-का गोठ जानथव? तुमन के गांव म मातर के दिन का-का बिसेस परंपरा निभाए जाथे? अपन विचार अऊ जानकारी कमेंट म जरूर लिखहू, ताकि हमर छत्तीसगढ़ी संस्कृति के ये सुग्घर गोठ ह सबो झन तक पहुंच सकय!

अंजोर:छत्तीसगढ़ी समाचार, 

संपादक/अनुवादक-जयंत साहू 9826753304