रायपुर, 10 नवंबर 2026: छत्तीसगढ़ के सोंधी माटी के एक अइसन बेमिसाल कलाकार संतोष सारथी, जेन साधनहीन दौर म अपन खून-पसीना बहा के लोक कला अउ छत्तीसगढ़ी संस्कृति ल जीवंत रखिस। सन 1993 ले सुरु होइस ओखर ये कला-यात्रा आज छत्तीसगढ़ी सिनेमा, दूरदर्शन अउ रंगमंच के इतिहास म एक अमूल्य अउ प्रेरणादायी पन्ना बन चुके हावय।
लोक कला ले दूरदर्शन के मुख्य नायक तक (1993-2000)
संतोष सारथी के कला यात्रा के सुरुआत 1993 म ग्रामीण अंचल के रामलीला, पारंपरिक नाचा पार्टी अउ लोक कला मंच मन ले होइस। ओमन छत्तीसगढ़ के पुरोधा कलाकार मन के संग छोटे-बड़े मंच म नृत्य अउ अभिनय करके अपन कला ल निखारिस।
- पहिली ब्रेक: सन 1997 म रायपुर के प्रसिद्ध गायक राकेश तिवारी जी के सानिध्य म दूरदर्शन के प्रसिद्ध टेलीफिल्म 'लक्ष्मी' म मुख्य नायक (Lead Hero) के भूमिका मिलिस।
- स्वाभाविक अभिनय: बिना कोनो औपचारिक ट्रेनिंग के, संतोष सारथी के जीवंत अभिनय ल देख के निर्देशक ह दंग रहिगे रिहिन।
VCD एल्बम क्रांति अउ 'श्री सुन्दरम फिल्म्स' के सुनहरा दौर
साल 2000 म जब छत्तीसगढ़ी सिनेमा के मील के पत्थर फिल्म 'मोर छइंहा भुईंया' आइस, ओही बेरा संतोष सारथी अपन खुद के वीडियो फिल्म 'चंदन बाबू' के निर्माण करिन अउ लीड रोल निभाइन। ए फिल्म के एडिटिंग रायपुर के ऐतिहासिक बाबू लाल टॉकीज गली के प्रसिद्ध स्टूडियो 'श्री सुन्दरम फिल्म्स' म होइस, जेकर संचालन आनंद चौहान अउ लक्ष्मण चौहान जी करिन।
एखर बाद सुंदरानी वीडियो वर्ल्ड, ओसवाल, आर के जइसन बड़का कंपनी बर सारथी, करन खान, हरीश भट्टी जइसन दिग्गज कलाकार मन छत्तीसगढ़िया संस्कृति ल घर-घर पहुंचाइन। मशहूर गीत 'पान बना दे ठेला वाला' म अभिनय बर ओला मात्र 300 रूपिया के पारिश्रमिक मिलिस, फेर ओमन पइसा बर नइ, बल्कि कला के जनून बर काम करिन।
रंगमंच के पुरोधा मिर्ज़ा मसूद अउ 'गुण्डाधुर' के ऐतिहासिक किरदार
- छत्तीसगढ़ी रंगमंच के महान नाट्य निर्देशक स्व. मिर्ज़ा मसूद जी के सानिध्य म संतोष सारथी 'मृच्छकटिकम्', 'जांच पड़ताल' अउ 'जेब कतरे' जइसन नाटक म शानदार अभिनय करिन।
- गुण्डाधुर के जीवंत रूप: 2005 ले 2010 तक रायपुर नगर निगम के पार्षद रहे के बेरा, एक घटना के बाद ओमन बस्तर के महान क्रांतिवीर 'गुण्डाधुर' के किरदार ल मंच म अइसन उतारिन कि इतिहास साक्षात जीवंत हो गे।
नायक ले खलनायक तक:
संतोष सारथी 'परशुराम', 'बिदाई', 'किरिया' जइसन फिल्म म हीरो के रोल करिन, त 'प्रेम के बंधना' अउ 'दगाबाज़' म दमदार खलनायक बनके घलो दर्शक मनके दिल जीत लिहिन।
सोशल मीडिया के फेसबूक म संतोष सारथी जी ह ये जानकारी साझा करत ओमन अपन बारे म कहिन के- "मै आज भी जो कुछ करता हूँ, अपनी आत्मा की गहराइयों से करता हूँ। अभी के युवा कलाकारों से मैं यही कहना चाहूँगा कि एक-दो फिल्में या मंचीय कार्य करने से आप अभिमानी न बनें, कला जीवन भर सीखने की चीज़ है।"
(ये लेख बड़े भइया संतोष सारथी जी के फेसबूक पेज ले साभार लिये गे हावय।)
अंजोर: छत्तीसगढ़ी समाचार
संपादक/अनुवादक-जयंत साहू 9826753304
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।