ईसर-गौरा विवाह: छत्तीसगढ़ के गोंड समाज के अनमोल परंपरा, देवारी तिहार के खुशहाली अउ लोक संस्कृति के समागम

रायपुर, 10 नवंबर 2026। छत्तीसगढ़ के आदिवासी अंचल मन म अनेकन प्रकार के तिहार मनाए जाथें, जेन म इहाँ के संस्कृति अउ प्राचीन रीति-रिवाज के गहिर छाप दिखथे। इही परंपरा म एक प्रमुख अउ पवित्र तिहार हरे- गोंड आदिवासी समाज के 'ईसर-गौरा विवाह', जेन ह देवारी तिहार (दीपावली) के पावन अवसर म बड़ हर्षोल्लास के साथ मनाए जाथें। ये सिरिफ एक ठी तिहारे भर नोहे, बल्कि गोंड वंश के प्रथम राजा-रानी के विवाह के प्रतीक अउ आदिवासी संस्कृति के एक अटूट हिस्सा हरे।

ईसर-गौरा विवाह: ईसर देव अउ गउरा रानी कोन हे?

ईसर देव- गोंड वंश के प्रथम राजा अउ ईसर देव ह जेकर बिहाव गौरा माता के संग होथे। इही देव ल महादेव के रूप तको माने गे हावय। ईसर देव बइला के सवारी करथे।

गउरा माता- गोंड वंश के प्रथम रानी माता गउरा ल माने गे हावय जेकर बिहाव ईसर देव के संग होथे। गउरा माता ह कछुआ के सावारी करथे। अब येला माता पार्वती के रूप तको माने जाथे। 

फूल कुचरे के लेके गौरा जगाये के नेंग :

ईसरदेव-गौरा शुरूवात कातिक पंचमी के दिन फूल कुचरे के परंपरा के संग चालू हो जाथे। नोनी मन के बिहनिया बेरा कातिक नहाए अउ संझा बेरा सुवा नाचे के जोखा मढ़ाए लगथें। सुवा गीत गाए अउ नाचे के परंपरा ह गौरा-ईसरदेव बिहाव परब संग जुड़े हे। जेमन गौरा-ईसरदेव पूजा के आयोजन करथें, ते मन ए गीत-नृत्य के माध्यम ले लोगन घर जा-जा के गौरा-ईसरदेव बिहाव म आए के नेवता देथें अउ संगे-संग वो दिन आने वाला खरचा के बेवस्था खतिर सेर सिधा अउ पइसा-कउड़ी सकेलथें।

गौरा जगाय के बुता गौरा-पूजा के नौ दिन पहिली हो जाथे। गौरा चौरा ल गोबर पानी म लीपे-पोते जाथे। सुरहुत्ती के दिन मुंदरहा ले कुंवारी माटी जेला कोनो भिंभोरा ले कोड़ के लाने जाथे। तेकर पाछू गांव के बइगा ह रंग-बिरंग के चमकीला कागज म सजावत वोला गौरा-ईसरदेव के अलग-अलग मूर्ति बनाथे। गौरा-ईसरदेव परब के हर एक रिवाज खातिर अलग-अलग लोक गीत के गायन करे जाथे। 

सुरहुत्ती के आधा रात के गौरा-ईसरदेव के मुख्य आयोजन शुरू होथे, जेन ह बिहनिया कोनो नंदिया या तरिया म वोकर मन के विसर्जन तक चलथे। एकर पहिली गौरा चौरा ले तरिया या विसर्जन स्थल तक लेगे के पहिली रस्ता म परने वाला जम्मो घर के दुवारी म रूकत-रूकत जाथें जेकर संबंधित घर वाले मन पूजा-आराधना करथें।

सुरहुत्ती ले सुरुआत अउ माटी जगाई के नेंग:

छत्तीसगढ़ अंचल म दीपावली यानी देवारी 'सुरहुती' ले सुरू होथे, जेकर मतलब होथे- तिहार के सुरुआत। संझा के बेरा वो दिन लोगन मन जुरियाके गांव के बाहिर जाथे, अउ एक ठउर (भिंभोरा) म पूजा करके उहां ले माटी लाथे। उही माटी ल फिलो के ईसर-गौरा के सुग्घर मूर्ति बनाये जाथे। ईसर देव ह बइला के सवारी करथे अउ गौरा माता के सवारी कछुआ म रिथे। ये मूरती ल पिड़हा म मड़ा के सुंदर-सुंदर चकमकी कागज ले सजाये जाथे। पिड़हा के चारों कोना म चार खम्बा लगाके ओमा दीया बारे जाथे। 

पिड़हा: पिड़हा एक प्रकार के लकड़ी के बने पाटा होथे। पिड़हा के पाट के उंचाई ह 4-5  इंच ले जादा नइ होवय। माने एक झिन के बइठे के पुरती भर होथे, एक झिन के हमउ पाटा ल ही पिड़हा कहे लाथे। 

डड़ईया: गौरा गीत म लोंगन मन डड़ईया जघथे। ओमा महिला अउ पुरूष, जवान-लइका नोनी-बाबू मन ईसर-गौरा के गाजा-बाजा के धुन म नाचथे उही मन ल 'डड़ईया' चघना कहे जाथे। बाबू पिला मन डड़ईया चघथे त ओमन ला हाथ अउ गोड़ म सोटा मारे जाथे। फेर नोनी पीला मनला बोड़ा चूहाये जाथे। गांजा या हूम के धुआं- डड़ईया चघाइया मन म कई झिन मन गांजा या हूम के धुआ लेथे। 

• सोटा : सोटा कांसी के डोरी ले बने होथे, येहा दू फीट लांंम होथे। जब गउरा गीत म कोनो डड़इया चघथे तव इहां सोटा ले ओमन ल हाथ अउ पांव म मारथे।
• बोड़ा: बोड़ा कांसी के डोरी ल तेल म बूड़ो के हथेरी म चूहाथे। बोड़ा ह एक प्रकार के डोरी के गरम तेल ल हथेरी म लेना होथे।
• गांजा या हूम के धुआं : जब कोनो डड़ईया चघथे तव ओमन ल गांजा रमंज के आगी के छेना म धुआं देथे। इही रकम ले हूम के तको आगी के छेना म धुआं करे जाथे।

बाजा-रूंजी के मनमोहक गूंज

गऊरा लोक गीत सिर्फ महिला मन ही गाथे अउ पुरूष मन दफड़ा, दमऊ, मोहरी, झुमका, टासा बाजथे। येला 'गड़वा बाजा' तको कहिथे। केहे जाथे के येला गाड़ा जनजाति के मन बजावय इही सेती येकर गड़वा बाजा नाव परिस। अब तो येला सबो समाज के लोगन मन बजाये लगे हावय।

माटी जागृत करके सिरजाथे ईसर-गौरा के मूरत

गोंड आदिवासी समाज म 'ईसर-गौरा विवाह' के परंपरा बहुत प्राचीन हावय। ए प्रथा के सुरुआत गाँव के माटी घर ले होथे, गाँव के लोगन मन माटी ला के बड़ सुग्घर ढंग से भगवान शिव (शंभू शके) अउ गौरा माता के मूरत सिरजाथें यानी माटी ला जागृत करथें। ए दौरान पारंपरिक बाजा-गाजा के संग छत्तीसगढ़ी लोकगीत मन के गूंज सुनाथे:

“एक पतरी रैनी बैनी हो...

जोहर जोहर मोर गवरा गवरी हो सेवर लागौं मै तोर

जोहर जोहर मोर ठाकुर देवता सेवर लागो में तोर...”

करसा परघनी

माटी ले ईसर देव अउ गउरा रानी के मूरती के बाद बिहाव के सरी नेंग जोग करे के बाद करसा परघनी होथे। जेमा गांव के आन महिला मन तको सहभागी होथे। महिला मन घर घर जाके करसा परघाथे। धान के बाली ले सजे अउ चांउर ले भरे ये करसा म दीया बारके, मुड़ में बोह के निकलथे निकालथे।  

कलसा परघात गौरा चौक म लाए जाथे, जिहां बिहाव के सबो नेग-जोक पूरा करे जाथें। एखर बाद गाँव के सबो लोगन मिल के बारात निकालथें। मूरती के स्थापना के बेरा ईसरदेव बइला ऊपर अउ गौरा माता कछुआ ऊपर सवार रहिथें। मान्यता के अनुसार, जउन बइल म सवार होथें, ओमन मरकाम गोत्र के होथें अउ जउन कछुआ पर सवार होथें, ओमन नेताम घर के बेटी होथें। धर्मगुरु पहन दीपारी कुपा लिंगो के बनाए गोत्र के हिसाब से ए परंपरा ला निभाए जाथे।

ईसर देव के बरात अउ गांव के भ्रमण

छत्तीसगढ़ म बिहाव के नेंग-जोग म जइसे उल्लास दिखथे वइसन आन प्रदेश म देखे बर नइ मिलय, जइसे मनखे मनके बिहाव के नेंग-जोग होथे उही रकम ले ईसरदेव अउ गउरा माता के बरात के झांकी गाजा-बाजा के संग गांव घूमे बर निकलथे। गांव म घर-घर ले दाई-माई मन ईसरदेव अउ गउरा माता के दरसन करे बर निकलथे।

ईसर देव अउ गउरा माता के के मूरति विर्सजन

ईसर देव अउ गउरा माता के के मूरति के अब विसर्जन के बेरा आ जथे। दाई-माई अउ कुटुम परिवार के मन जेन रकम ले ईसर देव अउ गउरा माता के उच्छाह ले बिहाव के परब मनाथे उही उच्छाह ले उंकर मूरती ल ​तरिया-नदिया म विसर्जन करे बर लेके जाथे। गउरा चौरा ले ईसर देव अउ गउरा माता ल बाजा-रूंजी के संग नाचत-गावत विसर्जन झांकी देखे बर गांव उमड़ परथे। 

का हें खास हावय ईसर-गौरा विवाह?

लोगन मन के कहना हावय कि गोंड आदिवासी समाज म पहिली बिहाव के रूप म 'ईसर राजा' अउ 'गौरा माता' के विवाह करे जाथे, काबर के ये प्रथा आदि काल ले चलत आहत हावय। ए परंपरा म वैवाहिक लेनदेन के विशेष प्रचलन होथे, एखर सेती दूनो देवी-देवता ला अलग-अलग घर म रखके पूजा करे जाथे।

बुजुर्ग मन के कहना हावय कि आज के युवा पीढ़ी ल अपन ये प्राचीन वैवाहिक रीति-रिवाज़ अउ संस्कृति ल कभू नइ भूलना चाही। हज़ारों बछर ले चल आत गोंड वंश के ए महान परंपरा ला पीढ़ी-दर-पीढ़ी सहेज के रखना हम सबके जिम्मेदारी हावय।

अंजोर: छत्तीसगढ़ी समाचार, 

संपादक/अनुवादक-जयंत साहू 9826753304