अंजोर, रायपुर। छत्तीसगढ़ी सिनेमा के मयारू अउ परसिद्ध हिरोइन अनिकृति चौहान एक बार फेर बड़े पर्दा म अपन अदाकारी के जलवा बिखेरे बर तइयार हावे। जीत एंटरटेनमेंट अउ आर एस फिल्म्स अड़्डा के बैनर तले बने नवा धार्मिक अउ पारिवारिक फिल्म 'भक्त माँ कर्मा' म अनिकृति चौहान मुख्य रूप म 'माता कर्मा' के दमदार किरदार म नजर आही। दरसक मन ल गजब दिन के बाद अनिकृति के अइसन अलौकिक अउ भक्ति ले भरे रूप देखे बर मिलही, जेला लेके सिनेमा प्रेमी मन म अब्बड़ उत्साह हावे। बतादन के ये फिलिम कई बछर पहिलर बन चुके रिहिसे। लेकिन कोनो कारन से सिनेमाघर म नइ आइस। अब निर्माता निर्देश मन फेर येला गजब मेहनत के बाद सिनेमाघर म 15 मई लानत हाबे। 'भक्त माँ कर्मा' के निर्माण जीत एंटरटेनमेंट, आर एस फिल्म्स अड़्डा के बैनर तरी करे गे हावय। येकर अजय खांडेकर, राजकुमार यादव अउ निर्देशन करे हाबे शशिकांत कौशिक ह कहानी ल राजेश साहू लिखे हाबे।
कर्मा माता के रूप म अनिकृति के भावुक झलक
फिल्म के जारी पोस्टर म अनिकृति चौहान ह 'माँ कर्मा' के रूप म बड़ सुग्घर दिखत हे। पोस्टर के म ओहा हाथ म भगवान श्रीकृष्ण के मूरति ल धर के, रोवत-गावत अब्बड़ भावुक मुद्रा म दिखत हे। पोस्टर के पाछू डहर उड़ीसा के परसिद्ध श्री जगन्नाथ मंदिर अउ भगवान के सुंदर रूप दिखत हे। एकरे संग पोस्टर म गांव-घर के सुग्घर नजारा, गाय-गरवा, साधु महाराज अउ पारंपरिक सुग्घर पहनावा म कलाकार आन मन घलो दिखत हें, जेकर ले हमर छत्तीसगढ़ के संस्कृति के झलक मिलथे।
भगवान श्रीकृष्ण अउ माँ कर्मा के अटूट भक्ति के कहानी
ये फिल्म ह हमर आस्था के प्रतीक 'माँ कर्मा' के अटूट भक्ति अउ सरधा के कहानी ऊपर आधारित हे। कथे कि माता कर्मा के निश्छल भक्ति ले खुश होकर स्वयं भगवान श्रीकृष्ण (जगन्नाथ जी) ह ओकर हाथ के बने खिचड़ी खाय बर आये रिहिन। निर्देशक शशिकांत कौशिक ह अनिकृति चौहान अउ बाकी कलाकार मन के माध्यम से ए अलौकिक अउ धार्मिक प्रसंग ल बड़ सुग्घर ढंग से पर्दा म उतारे हे।
मंजे हुए कलाकार अउ मजबूत टीम
कर्मा माता के रूप म अनिकृति चौहान के संग ए फिल्म म गुलशन साहू, विक्रम राज, पुष्पेंद्र सिंह, डॉ अजय सहाय, योगेश अग्रवाल, उपासना वैष्णव, अउ शैलेन्द्र भट्ट सहित छत्तीसगढ़ के कतको मंजे हुये कलाकार मन घलो अपन कला के जोहर देखावत नजर आही।
बंबई के दिग्गज गवइया मन के सुग्घर आवाज
ए फिल्म के सबले बड़े खासियत एकर गाना होही। डी.पी. विश्वकर्मा के संगीत निर्देशन म बने भजन अउ गीत मन ल भारत के सबले बड़े अउ दिग्गज गवइया मन अपन सुग्घर आवाज दे हें, जइसे- आशा भोंसले, कविता कृष्णमूर्ति, सुरेश वाडेकर, साधना सरगम, उदित नारायण, अल्का याग्निक। इतका बड़े-बड़े गायक मन के होय ले ये पक्का हे कि फिल्म के भजन मन ल सुनके मन गदगद हो जाही।
15 मई के दिन सिनेमाघर म घलो मचही धूम
प्रोडक्शन टीम कोति ले 'भक्त माँ कर्मा' के प्रदर्शन के तारीख 15 मई बताये गे हावय। येकर तइयारी म पूरा टीम लगे हावय, बिलासपुर म प्रचार अउ प्रेस कांसफ्रेस के जरिया निर्माता-निर्देशक मन मीडिया जगत ले रूबरू होवत हाबे।
तकनीकी टीम म कैमरामैन संतोष सिन्हा अउ राजू सोनी, अउ कोरियोग्राफर निशांत उपाध्याय अउ दिलीप बैस ह बड़ मिहनत करे हें। मेकर्स मन के कहना हे कि 'भक्त माँ कर्मा' ह सिरिफ एक फिल्म नो हे, बल्कि येहा दरसक मन ल सच्चा भक्ति अउ सरधा के रस्ता देखाय के एक सुग्घर प्रयास आए।
अनिकृति चौहान के वइसे अभी जानकी के बाद कोई बड़े फिल्म पर्दा में नइ आये हाबे, ऐसा के बछर म 'भक्त माँ कर्मा' ओकर बड़े काम के साबित होही। काबर ये फिलिम के निर्माण 13 बछर पहिली होए रिहिस हाबे। अब ओमन बखत के कलाकार अउ तकनीक तब अब तक बहुत आगू आगे हावय। अनिकृति चौहान के जुन्ना दिन के सुरता के संग ओमन के कर्मा माता वाले दिव्य रूप ल देखे बर दरसक मन के तको अगोरा करत हाबे। ये 15 मई 2026 के खतम हो जाही, जब ये फिल्म ह छत्तीसगढ़ के सिनेमाघर मन म रिलीज होही।
संगी हो अंजोर: छत्तीसगढ़ी वेबसाइट के खबर आप मन कइसे लगथे कमेंट करके जरूर बताहू। महतारी भाखा छत्तीसगढ़ी के मान बगरावत शेयर अउ लाइक तको कर देहू, बहरहाल संपादक जयंत साहू अउ पूरा टीम कोति ले 'भक्त माँ कर्मा' के सफलता खातिर बहुत बहुत बधाई... जय कर्मा माता।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।