छत्तीसगढ़ म नक्सलवाद के खिलाफ चलत अभियान सरकार ल सरलग सफलता मिलते हावय। बस्तर संभाग के जगदलपुर म मोस्ट वॉन्टेड हार्डकोर नक्सली कमांडर पापाराव ह अपन 17 साथी मन के संग आत्मसमर्पण करिस। ए घटना ले बस्तर म सांति, बिसवास अउ विकास के डगर म एक ऐतिहासिक मील के पत्थर माने जावत हे।
मुख्यमंत्री विष्णु देव साय ह ए आत्मसमर्पण ल नक्सलवाद के खिलाफ निर्णायक प्रहार बतावत कहिन कि नक्सलवाद अब अपन आखरी बेरा म हे अउ बस्तर के धरती म हिंसा के बिचारधारा हारत दिखत हे। ओमन कहिन कि कतको बछर ले डर अउ हिंसा के माहौल बनाइया वाला माओवादी बिचारधारा अब सिरायवत हावय अउ बस्तर विकास के मुख्यधारा ले जुड़त हे।
मुख्यमंत्री श्री साय ह कहिन कि राज सरकार के साफ-सुथरा, संवेदनशील अउ पुनर्वास नीति के सेती भटके युवा मन अब मुख्यधारा म लहुटे के बिसवास पावत हें। ओमन कहिन कि ये आत्मसमर्पण ए बात के प्रमाण आय कि कहुं सही मउका, सुरक्षा अउ सम्मानजनक जिनगी के भरोसा मिले, त हिंसा के रद्दा छोड़ के विकास के डगर ल अपनाय जा सकथे। ओमन कहिन कि आज बस्तर म बंदूक के आवाज नहीं, बल्कि विकास, बिसवास अउ नवा उम्मीद के गूंज सुनाई देवत हे। सड़क, शिक्षा, स्वास्थ्य अउ रोजगार के क्षेत्र म तेजी ले होवत काम मन ह बस्तर के जनजीवन म सुग्घर बदलाव लाय हे।
मुख्यमंत्री श्री साय ह ए उपलब्धि के श्रेय प्रधानमंत्री नरेंद्र मोदी के दूरदर्शी नेतृत्व अउ केंद्रीय गृहमंत्री अमित शाह के सशक्त मार्गदर्शन ल देवत कहिन कि नक्सलमुक्त भारत के संकल्प अब निर्णायक मोड़ म पहुंच चुके हे। ओमन सुरक्षा बल के जवान मन के साहस, समर्पण अउ रणनीतिक कार्रवाई के घलो तारीफ करिन।
मुख्यमंत्री ह बिसवास जताइन कि माओवाद के पूरा खात्मा के संग बस्तर म सांति, विकास अउ बिसवास के ये जात्रा अइसने आगू बढ़त रइही अउ छत्तीसगढ़ देस के सुरक्षित, समृद्ध अउ विकसित राज मन म पहिली नंबर म रइही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।