फिल्मी दुनिया म अपन अभिनय अउ कॉमेडी ले जम्मो मनखे मन ल हँसाने वाला मशहूर कलाकार राजपाल यादव आज काल भारी मुश्किल दौर ले गुजरत हावयं। साल 2010 के एक पुराना चेक बाउंस मामला म ओमन ल दिल्ली के तिहाड़ जेल म सरेंडर करे बर परिस हे। राजपाल यादव ऊपर आरोप हे कि ओ मन ह एक कंपनी ले फिल्म बनाये बर उधार पइसा ले रिहिन, जेला ओमन ह सही समय म वापस नइ कर पाइन।
ये पूरा मामला तब शुरू होइस जब राजपाल यादव ह साल 2010 म 'अता पता लापता' फिल्म बनाये बर एक कंपनी ले 5 करोड़ रूपया उधार लिस रिहिन। बदकिस्मती ले फिल्म ह रिलीज होय के बाद बॉक्स ऑफिस म बुरी तरह ले पिटगे अउ राजपाल यादव के पूरा पइसा डूबगे। जब कंपनी ह अपन पइसा वापस मांगिस, त ओ मन ह 7 ठन चेक दीन, जो कि बैंक म बाउंस हो गे। ओखर बाद ये मामला कोर्ट म चलिस अउ 16 साल बीतते-बीतते ब्याज मिला के ये रकम 9 करोड़ रूपया हो गे।
हैरानी के बात ये हे कि राजपाल यादव के नेट वर्थ आज घलो 50 ले 85 करोड़ रूपया के बीच बताए जाथे, फेर ओ मन उधार के पइसा नई चुका पाइन। फिल्म मन म काम करे के बाद घलो पइसा नई दे पाय के एक बड़े कारण 'लिक्विडिटी' के कमी बताए जाथे, मतलब ओमन के संपत्ति त हावे फेर हाथ म नगद पइसा के कमी हे। दिल्ली हाईकोर्ट ह ओमन ल कतको मौका घलो दिस, फेर आखिरी म पइसा नइ पटे के कारण जेल जाये बर परिस।
ए खबर के बाद ले फिल्मी जगत म घलो हलचल मच गे हे। राजपाल यादव के प्रशंसक मन ये सोच के परेशान हें कि जउन कलाकार दुनिया ल हँसाथे, आज ओ ह खुद अइसन कानूनी पचड़ा म फंस गे हे। हालांकि, ये खबर ले ये बात घलो साफ होथे कि कानून जम्मो मनखे बर एक बरोबर हे, चाहे वो कोई आम आदमी होय या फेर बड़े फिल्मी सितारा। अब देखना ये हे कि राजपाल यादव ये मुश्किल ले कइसे बाहिर निकलथें।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।