धान के बोनस पइसा ये दिन मिलही, दस हजार करोड़ रूपया के बोनस राशि एकमुश्त

छत्तीसगढ़ के मुख्यमंत्री विष्णु देव साय जी के अगुवाई म मंत्रिपरिषद ह फैसला ले हावय के प्रदेश के लगभग 25 लाख 24 हजार 339 किसान मन बर सरकार ह 10,000 करोड़ रूपया के बोनस राशि (अंतर के राशि) एकमुश्त होली तिहार केि पहिली देही। सरकार के ए फैसला ले अब किसान मन के घर म होली के तिहार अउ जादा उत्साह के साथ मनाय जाही।

ये योजना के तहत, साय सरकार ह अपन वादा ल पूरा करत किसान मन ल 3100 रूपया प्रति क्विंटल के मान ले धान के अंतर के राशि ल सीधा ओकर मन के बैंक खाता म ट्रांसफर करही। एखर मतलब ये हे कि अब किसान मन ल बोनस बर लंबा इंतजार करे के जरूरत नई हे; होली ले पहिली ही पैसा खाता म पहुंच जाही।

'कृषक उन्नति योजना' के माध्यम ले अब तक प्रदेश के किसान मन ल कुल 35,000 करोड़ रूपया के भुगतान सुनिश्चित करे जा चुके हावय। सरकार के कहना हे कि ये कदम ले न केवल किसान मन के आर्थिक स्थिति मजबूत होही, बल्कि ग्रामीण अर्थव्यवस्था म घलो तेजी आही। सुशासन अउ किसान मन के सम्मान ल ही ये सरकार ह अपन पहिली प्राथमिकता बताए हे।

किसान भाई मन बर ये समय बहुत खुसी के हे, काबर कि धान के मिहनत के सही दाम अब सीधा ओ मन के हाथ म होही। एखर ले खेती-किसानी के काम अउ घर-परिवार के जरूरत मन ल पूरा करे म बहुत मदद मिलही। छत्तीसगढ़ के सुशासन सरकार ह ये बता दिस हे कि किसान मन के हित म काम करना ही ओ मन के असली पहिचान आय।