जिला कांग्रेस कमेटी सक्ति के अगुवाई म केंद्र सरकार के नीति मन के खिलाफ 'मनरेगा बचाओ संग्राम' के बड़े आयोजन करे गिस। ए दौरान कलेक्ट्रेट के घेराव करत हुए कांग्रेस कार्यकर्ता मन ह जमके प्रदर्शन करिन अउ केंद्र सरकार के खिलाफ नारेबाजी करिन। कांग्रेस के कहना हे कि भाजपा सरकार ह मनरेगा जइसन गरीब मन के सहारा योजना ला राजनीतिक साजिश के तहत कमजोर करे के कोसिस करत हे, जेखर से ग्रामीण क्षेत्र म मजदूर मन ला भारी दिक्कत होवत हे।
प्रदर्शन म शामिल नेता मन ह आरोप लगाइन कि केंद्र के भाजपा सरकार ह जान-बूझके मनरेगा के बजट म भारी कटौती कर दे हे अउ नियम मन ला अतका कठिन बना दे हे कि गरीब मन ला ओखर हक नई मिल पावत हे। ग्रामीण अर्थव्यवस्था ला चोट पहुंचाए अउ मजदूर मन के पसीना के कमाई ला रोके के ए दमनकारी नीति के खिलाफ कांग्रेस ह हुंकार भरिस हे। कांग्रेसी मन के कहना हे कि भाजपा ह सिर्फ बड़े मनखे मन के चिंता करथे अउ गरीब मन के पेट म लात मारत हे।
ए आंदोलन म छत्तीसगढ़ सह प्रभारी श्रीमती जरिता लेफ्तलॉन्ग, पूर्व मंत्री जयसिंह अग्रवाल, अउ मनरेगा प्रभारी उमेश पटेल जइसन दिग्गज नेता मन सामिल होइन। विधायक रामकुमार यादव, बालेश्वर साहू अउ जिला अध्यक्ष रश्मि गभेल के संग ब्लॉक कांग्रेस, महिला कांग्रेस अउ युवा कांग्रेस के भारी भीड़ कलेक्ट्रेट घेरे बर उमड़ पड़ीस। सबो नेता मन ह एक सुर म कहिन कि जब तक हर हाथ ला काम अउ सही दाम नई मिल जाही, तब तक सड़क ले सदन तक ए लड़ाई ह जारी रही।
सक्ति के ए प्रदर्शन ह साफ कर दिस हे कि मनरेगा अउ मजदूर मन के अधिकार बर कांग्रेस ह कोनो भी हद तक जाय बर तैयार हे। भारी संख्या म जुटे ऊर्जावान कार्यकर्ता मन ह संकल्प लीन कि ग्रामीण जनता के हक बर ओ मन हमेशा खड़ा रहिहीं। ए घेराव प्रदर्शन ले प्रशासन अउ सरकार ला सीधा चेतावनी दे गे हे कि यदि मजदूर मन के हित मा फैसला नई लीस, त आने वाला समय म ए आंदोलन अउ जादा उग्र हो जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।