'संविधान निर्माण में छत्तीसगढ़ का योगदान' किताब के विमोचन 1 दिसंबर के

छत्तीसगढ़ के लोकतांत्रिक चेतना, इतिहास अऊ संस्कृतिक चिन्हारी ल सोरियावत लिखे गे महत्वपूर्ण किताब 'संविधान निर्माण में छत्तीसगढ़ का योगदान' के विमोचन 1 दिसंबर के होही। ये किताब लोकतंत्र सेनानी अऊ राज्य निर्माण सेनानी जागेश्वर प्रसाद जी के लिखे आय, जेन ह संविधान, लोकतंत्र अऊ छत्तीसगढ़ के ऐतिहासिक-सांस्कृतिक धरोहर ऊपर कई बच्छर ले बुता करत हावय।

विमोचन कार्यक्रम विधानसभा अध्यक्ष के निवास कार्यालय म सांझ 6 बजे रखे गे हे। कार्यक्रम के माई पहुना होही छत्तीसगढ़ विधानसभा अध्यक्ष डॉ. रमन सिंह जी। कार्यक्रम के अध्यक्षता संस्कृति विशेषज्ञ अशोक कुमार तिवारी जी करहीं, जेन ह छत्तीसगढ़ के लोकपरंपरा अऊ सांस्कृतिक धरोहर के संरक्षण म महत्त्वपूर्ण भूमिका निभावत आहें।

ये मउका म मुख्य वक्ता डॉ. डी.डी. महंत जी रहिहीं, जेन ह संविधान, शासन व्यवस्था अऊ सामाजिक चेतना म अपन विचार ले अंजोर बगराही।

किताब के लेखक जागेश्वर प्रसाद जी बताइन के ये किताब छत्तीसगढ़ के ओ योगदान मनला उजागर करथे, जेन संविधान निर्माण म अपन गहिर छाप छोड़िन। ओमन कहिन के किताब के मूल उद्देश्य नवा पीढ़ी ला संविधान के मूल्य, छत्तीसगढ़ के ऐतिहासिक योगदान अऊ लोकतांत्रिक विरासत ले अवगत कराना हावय।