छत्तीसगढ़ रेल हादसा : बिलासपुर के लालखदान के पास मेमू अऊ मालगाड़ी के बीच जोरदार टक्कर, कई घायल- रेल प्रशासन जारी करिस हेल्पलाइन नंबर

छत्तीसगढ़ के बिलासपुर जिला म मंगलवार के संझा एक बड़का रेल दुर्घटना हो गे। ए हादसा म 4 महिला अउ 2 लइका समेत 6 झन यात्री के मौत होय के पुष्टि हो गे हवय। उहें 2 दर्जन ले जियादा लोगन घायल हो गइन। रेलवे विभाग यात्रिमन अऊ ओमन के घरवाला बर आपातकालीन हेल्पलाइन नंबर जारी करे हवय, जेकर ले अपन-अपन परिजन के हालचाल जान सकथें।

कइसे होइस हादसा

मिले आरो के मुताबिक, कोरबा ले बिलासपुर आवत कोरबा मेमू पैसेंजर ट्रेन अऊ एक मालगाड़ी के बीच लालखदान के पास जोरदार टक्कर होइस। टक्कर अतका जबर रहिस कि मेमू ट्रेन के कई डिब्बा पटरी छोड़के मालगाड़ी के ऊपर चढ़ गे। इंजन ले लगे महिला कोच सबसे जियादा खराब हो गे।

मउका म पहुंचिन बचाव दल

घटना के जानकारी मिलतेच रेल प्रशासन, एनडीआरएफ अऊ मेडिकल टीम तुरते घटनास्थल म पहुंच गे। टीम मिलके डिब्बा म फंसे यात्री ल बाहर निकालना सुरू कर दीस। घायलो मन ल बिलासपुर अऊ आसपास के अस्पताल म भर्ती कराय गे हवय।

रेलवे जारी करिस हेल्पलाइन नंबर

रेलवे प्रशासन यात्रिमन अऊ ओमन के परिवारजन बर 6 ठन स्टेशन म हेल्प डेस्क लगाय हवय। ए नंबर म फोन कर के लोगन अपन परिजन के जानकारी ले सकथें-

• बिलासपुर :  7777857335, 7869953330
• चांपा :  8085956528
• रायगढ़ :  9752485600
• पेंड्रा रोड :  8294730162
• कोरबा :  7869953330
• रायपुर हेल्प डेस्क :  7777814132

येकरे संग दुर्घटनास्थल लालखदान म भी दू ठन आपातकालीन नंबर जारी करे गे हवय। रेलवे के सीनियर डीसीएम कहिन हें-  “सबसे पहिली बात, कोई जानकारी चाहत हवय त 1702 नंबर म कॉल करके सीधा रेलवे कंट्रोल रूम ले संपर्क कर सकथे।”

जांच अऊ राहत काम सुरू

रेल प्रशासन कहिस के यात्रिमन के सुरक्षा अऊ राहत काम ल पहिली प्राथमिकता म रखे गे हवय। घायल मन ल तुरते हॉस्पिटल पहुंचाय जात हावय अऊ सब अस्पताल ल अलर्ट कर दे गे हवय। रेल हादसा काबर होइस, ओकर जांच बर आदेश जारी कर दे गे हवय।

शोक अऊ संवेदना

राज्य भर म ए हादसा ले शोक के माहौल हवय। जनता भगवान ले प्रार्थना करत हवय कि दिवंगत आत्मा ल शांति मिलय अऊ घायल यात्री जल्द ठीक हो जावंय।