सौर ऊर्जा सिरिफ बिजली बनाय के साधन नइये, ये सशक्तिकरण अउ समावेशी विकास के प्रतीक घलो हे : राष्ट्रपति द्रौपदी मुर्मु

नई दिल्ली म राष्ट्रपति श्रीमति द्रौपदी मुर्मु जी मन अंतरराष्ट्रीय सौर गठबंधन (आईएसए) के आठवां सत्र के पूरा अधिवेशन के उद्घाटन करिन। ये मउका म राष्ट्रपति कहिन, आईएसए मानवता के वो साझा सपना के प्रतीक आय, जिहां सौर ऊर्जा ला अपनाय के भावना समावेशन, गरिमा अउ सामूहिक समृद्धि के स्रोत के रूप म देखे जाथे।

राष्ट्रपति महोदया कहिन के, जलवायु परिवर्तन आज पूरा दुनिया बर एक बड़ा चुनौती बन गे हे। ये संकट ले निपटाय बर तुरते अउ ठोस कदम उठाना जरूरी हे। भारत जलवायु परिवर्तन ले लड़य बर प्रतिबद्ध हे अउ कई ठोस कदम उठावत हे। ओमन कहिन के, आईएसए सौर ऊर्जा के उपयोग ला बढ़ावा देवत हे, जेन ले ये वैश्विक संकट के समाधान म मदद मिलत हे।

राष्ट्रपति कहिन के, समावेशन के विचार भारत के विकास यात्रा के पहचान हे। दूर-दराज इलाका म घर ला रोशन करे के अनुभव ये बताथे के ऊर्जा समानता, सामाजिक समानता के नींव हे। सस्ती अउ स्वच्छ ऊर्जा तक पहुँच लोकमन ला सशक्त बनाथे, स्थानीय अर्थव्यवस्था ला बढ़ाथे अउ एखर ले सिरिफ बिजली नइ, बलकि रोजगार अउ अवसर घलो मिलथें।

ओमन कहिन के, सौर ऊर्जा सिरिफ बिजली बनाय के साधन नइये, ये सशक्तिकरण अउ समावेशी विकास के प्रतीक घलो हे।

राष्ट्रपति महोदया सब सदस्य देश मन ला किहिन के ओमन सिरिफ ढांचा बनाय म नइ, बल्कि लोकमन के जीवन ऊपर ध्यान देवंय। ओमन कहिन के, ये सभा ला एक सामूहिक कार्य योजना बनाय बर चाही, जेन सौर ऊर्जा ला रोजगार सृजन, महिलामन के नेतृत्व, ग्रामीण आजीविका अउ डिजिटल समावेशन ले जोड़े। प्रगति के माप सिरिफ मेगावाट म नइ होवय, बल्कि कितना जीवन रोशन होइस, कतका परिवार सशक्त होइस अउ कतका समुदाय बदले हें – ये बात ले मापे जाय।

राष्ट्रपति कहिन के, प्रौद्योगिकी विकास अउ उन्नत तकनीक के साझा उपयोग ऊपर ध्यान देबो जरूरी हे, ताकि सबके लाभ हो सके। ओमन ये घलो जोड़िन के, जब हमन बड़े पैमाने मं सौर ऊर्जा परियोजना बनावत हन, त पारिस्थितिक संतुलन बने रहय – ये बात ला ध्यान मं रखे बर जरूरी हे, काबर पर्यावरण के रक्षा ही हरित ऊर्जा के असली आधार हे।

अंत मं राष्ट्रपति द्रौपदी मुर्मु कहिन के, हमन सिरिफ अपन देश बर नइ, बल्कि पूरा दुनिया अउ आने वाली पीढ़ी बर घलो समर्पण ले काम करे बर चाहथन। ओमन विश्वास जताइन के, इस सभा के चर्चा अउ निर्णय सौर ऊर्जा के उत्पादन मं एक बड़ी उपलब्धि साबित होही, जेन ले एक समावेशी अउ न्यायसंगत दुनिया बनाय मं मदद मिलही।