रायपुर बंद: छत्तीसगढ़ महतारी के मूर्ति तोड़े के विरोध में 31 अक्टूबर के रायपुर बंद

राजधानी रायपुर के वीआईपी चौक म लगे छत्तीसगढ़ महतारी के मूर्ति ल तोड़े के विरोध म जोहार छत्तीसगढ़ पार्टी अउ छत्तीसगढ़िया क्रांति सेना कोति ले 31 अक्टूबर के 'रईपुर बंद' के आहवान करे जात हावय। जानबा होवय के पाछू दिन वीआईपी चौक के मूर्ति ल टोर के फेके के जबर विरोध होइस, येमा प्रशासन के लापरवाही अउ कार्यवाही म देरी तको एक कारण रिहिस। जबकि ओकर पहिली ही प्रदेश के एक दैनिक अखबार नवभारत ह ये बिसय म खबर तको ​प्रकाशित करे रिहिस।

छत्तीसगढ़ महतारी के अपमान के सेती छत्तीसगढ़िया क्रांति सेना डहर ले जबर आंदोलन के चेतावनी के बाद प्रशासन कोति ले तुरते कार्रवाई करत, रातेच म ही मुर्ति के स्थापना अउ आरोपी के गिरफ्तारी करे गिस। मुख्यमंत्री विष्णुदेव साय तको अपराधी के जल्द ही गिरफ्तारी के बात कहे रिहिन। जम्मो प्रदेशवासी मन सोशल मीडिया के माध्यम ले विरोध प्रकट करिन।

ये मामला म प्रशासन के बुता ले जोहार छत्तीसगढ़ पार्टी अउ छत्तीसगढ़िया क्रांति सेना अभी तको नाराज हावय। आरो मिले हावय के 31 अक्टूबर के रायपुर बंद के आहवान करे हावय। इही ओढ़र में रायपुर प्रेस क्लब म पार्टी के पदाधिकारी गोपी साहू, यशवंत साहू, लक्ष्मी नाग सहित कई कार्यकर्ता मन जुरियाए रिहिन।