छत्तीसगढ़ के झांकी: बस्तर के विकास यात्रा मं केंद्रित, धानमंत्री नरेन्द्र मोदी अऊ गृह मंत्री अमित शाह देखहीं

राष्ट्रीय एकता दिवस (31 अक्टूबर) के मउका म गुजरात के एकता नगर (स्टैच्यू ऑफ यूनिटी) मं आयोजित होवइया एकता परेड-2025 मं छत्तीसगढ़ राज्य के झांकी के चयन होगे हवय। ये जानकारी भारत सरकार के गृह मंत्रालय द्वारा जारी सूची मं दे गे हवय, जेमा छत्तीसगढ़ के संग जम्मू-कश्मीर, गुजरात, महाराष्ट्र, मणिपुर, उत्तराखंड, पुडुचेरी, अंडमान अऊ निकोबार द्वीप समूह, एनडीआरएफ अऊ एनएसजी के झांकी घलो सामिल हवय।

मुख्यमंत्री विष्णु देव साय ए गौरवपूर्ण उपलब्धि खातिर छत्तीसगढ़ राज्य के जनसम्पर्क विभाग के पूरा टीम ला बधाई दीस। ओमन कहिन कि ये चयन छत्तीसगढ़ के सांस्कृतिक विविधता, लोक परंपरा अऊ एकता के भाव ला राष्ट्रीय स्तर मं पहिचान देथे। एकता परेड म प्रदर्शित होवइया ये झांकी हमर राज्य के ‘एकता मं विविधता’ के अद्भुत परंपरा ला जीवंत रूप म देखाही।

मुख्यमंत्री साय कहिन कि छत्तीसगढ़ के झांकी ए बछर बस्तर के बदलत पहचान अऊ विकास यात्रा म केंद्रित होही। राज्य शासन के जनसम्पर्क विभाग कोति ले तैयार करे जावत ये झांकी बस्तर के जनजातीय अस्मिता, पारंपरिक लोकनृत्य, वेशभूषा, ढोकरा धातु कला, आदिवासी चित्रकला अऊ आधुनिक विकास के समन्वय ला देखाही। झांकी के मुख्य संदेश होही कि बस्तर अब बदलाव के राह मं हवय- संघर्ष ले विकास के ओर, डर ले विश्वास के ओर। एमा दिखाय जाही कि जेन धरती कभी संघर्ष अऊ असमानता देखिस, आज वोही इलाका शिक्षा, स्वास्थ्य, उद्योग अऊ बुनियादी ढांचा के माध्यम ले शांति अऊ समृद्धि के नई पहचान गढ़त हवय।

राज्य सरकार के पुनर्वास अऊ विकासोन्मुख नीती नक्सल प्रभावित इलाका म स्थायी बदलाव के दिशा म नई ऊर्जा के संचार करिन हवय। ये झांकी सिरिफ बस्तर के सांस्कृतिक आत्मा ला प्रदर्शित नइ करही, बल्कि छत्तीसगढ़ के समग्र विकास, एकता अऊ लोकगौरव के झलक घलो देखाही।

राष्ट्रीय एकता दिवस के अवसर मं आयोजित ये भव्य परेड मं प्रधानमंत्री नरेन्द्र मोदी अऊ केंद्रीय गृह मंत्री अमित शाह स्वयं उपस्थित रहिहीं अऊ चयनित राज्य के झांकी के अवलोकन करहीं। ये आयोजन के उद्देश्य भारत के एकता, अखंडता अऊ सांस्कृतिक विविधता ला एक मंच म लाना हवय।

मुख्यमंत्री साय कहिन कि छत्तीसगढ़ के झांकी प्रधानमंत्री नरेन्द्र मोदी के “एक भारत, श्रेष्ठ भारत” के संकल्प ला मजबूत करही अऊ देश के सामने राज्य के समृद्ध सांस्कृतिक विरासत, विकास यात्रा अऊ सामाजिक एकता के उज्ज्वल उदाहरण प्रस्तुत करही।

अंजोर: छत्‍तीसगढ़ी समाचार

अनुवादक- जयंत साहू