राज्यपाल रमेन डेका ले हाई स्कूल के लइका मन करिस मुलाकात

राज्यपाल रमेन डेका ले राजभवन म रायपुर के निजी स्कूल के पढ़ईया मन ह मुलाकात करिस। ए मउका म डेका ह लइका ल जिनगी अउ कैरियर म सफलता पाये के खातिर मार्गदर्शन दीस अउ पढ़ईया मन के जिज्ञासा के समाधान करिन। पढ़ईया मन ह राज्यपाल के बात ल पूरा उछाह ले ध्यानपूर्वक सुनिस। 

राज्यपाल रमेन डेका Ramen Deka - Governor of Chhattisgarh

राज्यपाल ह पढ़ईया मन ले उंकर सपना अउ हॉबी म गोठबात करिस। ओमन किहिन के अनुशासन अउ धैर्य सफलता के कुंजी हावयं। यदि कोनो परीक्षा म सफलता न मिले त उंकर विकल्प तइयार रखें। पढ़ईया लइका मन जेन यूपीएससी के परीक्षा देना चाहत हावयं, उंकर खातिर पूरा लगन के संग तइयारी करें फेर आन विकल्प म तको धियान दें।

डेका ह किहिन के हर पढ़ईया ल अपन हॉबी विकसित करे के चाही काबर के ये व्यक्तित्व बनाये म सहायक होवत हावयं। एक पढ़इया लइका ह संगीत ले जुड़े अपन हॉबी के जिक्र करिन। ए म राज्यपाल ह किहिन के संगीत जिनगी के खातिर जरूरी हावय, एमे विज्ञान तको निहित हावय। पढ़ईया मन ह जब राजनीति के बारे म पूछिस त राज्यपाल ह किहिन के अच्छा लोगन ल राजनीति म आना चाही। ओमन किहिन के चुनौती के समाधान करे के खातिर सही समय म सही फइसला लेना जरूरी हावय अउ गुस्से म कोनो फइसला नइ लेना चाही। ओमन अनुभव, तर्कशक्ति अउ फइसला क्षमता ल जिनगी म सफलता के खातिर अहम बताइन। 

डेका ह किहिन के सतत् विकास सबले जरूरी विषय हावय। हमन ल अपन पृथ्वी अउ पर्यावरण ल बचाये के खातिर काम करे होही। हमन ल अपन वातावरण ल स्वच्छ रखना होही। ओमन किहिन के छत्तीसगढ़ म 45 परतिसत वन क्षेत्र हावय ये बात ओला बहुत प्रभावित करत हावय। राज्यपाल ह पढ़ईया मन ले किहिन के वो मेहनत अउ लगन के संग पढ़ाई करें अउ टॉपर बने के लक्ष्य रखें। ओमन बताइन के ए साल के बोर्ड परीक्षा के टॉपर पढ़ईया मन ल उंकर डहर ले 5 हजार रूपिया के प्रोत्साहन रकम तको दीस हावय। ए मउका म रेयान इंटरनेशनल स्कूल के प्राचार्य श्रीमती धनेश्वरी शर्मा, मैनेजर अउ आन स्टॉफ के संग पढ़ईया मन ल राजभवन के भ्रमण तको कराइन।

छत्‍तीसगढ़ी अनुवादक- जयंत साहू