रायपुर। छत्तीसगढ़ी सिनेमा ला एक अउ नवा उड़ान दे बर आवथे मोहन सुंदरानी के प्रस्तुति अउ भूपेंद्र चाँदनियाँ के निर्देशन म बने फिल्म “मैं राजा तैं मोर रानी (Mai Raja Tai Mor Rani)”, जऊन ह 4 जुलाई 2025 के दिन एके संगे छत्तीसगढ़, उड़ीसा अउ महाराष्ट्र के सिनेमाघर म धूमधाम ले रिलीज होवइया हे। एक पारिवारिक, प्रेम कहानी ले भरपूर, मनोरंजन म खचाखच भरे सिनेमा के निर्माण विजय सुंदरानी करे हावय, अउ हितेंद्र सुंदरानी सह-निर्माता के रूप म जुरे हावय।
★ कलाकार मन के दमदार टीम
फिल्म “मैं राजा तैं मोर रानी” म छत्तीसगढ़ के सुपरस्टार दीपक साहू अउ खूबसूरत नायिका एलसा घोष लीड रोल म दिखही। संग म मनोज जोशी, पुष्पेंद्र सिंह ठाकुर, अंजलि सिंह, अउ क्रांति दीक्षित जइसन गजब के कलाकार मन अपन अभिनय ले फिल्म म जान डाल दिहीं। एक ठन बढ़िया कहानी म मनोहर गाना, मया-परेम, संघर्ष अउ सामाजिक संदेस के मिलाप हवय।
★ जानव टेक्निकल टीम के जुगाड़
फिल्म के निर्देशन भूपेंद्र चाँदनियाँ करिन हे, अउ एकर गीत-संगीत म उत्तम तिवारी अपन सुर अउ बोल के जादू डारे हावय। कैमरा के कमान सिद्धार्थ सिंह थामे हावय, जेन हर एक एक सीन ला जिन्दा कर देथे। संपादन के जिम्मेदारी श्रेष्ठ वर्मा, एक्शन के देखरेख सतीश मास्टर, मेकअप म विलाश राउत अउ प्रोडक्शन डिजाइन म नीरज वर्मा अपन-अपन काम म सुघ्घर हें। लाइन प्रोड्यूसर के रूप म निखिल सुंदरानी ह व्यवस्था सम्हारे हावय, अउ फिल्म के डिस्ट्रीब्यूटर हें तरुण सोनी, जेनकर माध्यम ले फिल्म ह बड़े पैमाना म दर्शक तक पहुंचत हवय।
★ छत्तीसगढ़ी संस्कृति अउ आधुनिक सोच के संगम
“मैं राजा तैं मोर रानी” सिरिफ एक प्रेम कहानी नइ हे, बल्कि एमा छत्तीसगढ़ के परंपरा, संस्कृति, लोक रंग अउ आज के नवा पीढ़ी के सपना, संघर्ष अउ सोच ला जन-जन के संग म जोड़े गे हे। फिल्म म एकर हर पहलू ला गजब ढंग ले परोसे गे हे, जेन ह दर्शक के मन ला छूही।
★ 4 जुलाई 2025 – तारीख चिन्हारी के रखव
ए फिल्म 4 जुलाई के दिन छत्तीसगढ़, उड़ीसा अउ महाराष्ट्र के सिनेमाघर म एके संगे रिलीज होही। छत्तीसगढ़ी भाषा के चाहने वाला मन बर ए एक ठन बढ़िया मौका आय, जब अपन माटी के गंध अउ बोली के झलक बड़े परदा म देखे बर मिलही।
★ आप मन ले बिनती:
हमन सरलग छत्तीसगढ़ी़ सिनेमा के बढ़वार खातिर सिनेमा खबर आप मनके बीच लाथन। कला जगत के सबो गोठबात ल छत्तीसगढ़ी भाखा म परोसथन। संगवारी हो आप मन ल हमर ये उदीम बने लागत होही त, ये खबर ल शेयर जरूर करो।
 |
| दीपक साहू और एलसा घोष की नई छत्तीसगढ़ी फिल्म – देखव मया, एक्शन अउ संस्कृति के संगम |
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।