रायपुर, छत्तीसगढ़ | छत्तीसगढ़ के माटी म पहिली बेर बने हिंदी फिलिम "जानकी भाग-1" के रिलीज तारीख तय होगे हावय। ए फिल्म 13 जून 2025 के दिन पूरा भारत म एके संग रिलीज होही। ए फिलिम छत्तीसगढ़ी सिनेमा बर एक ऐतिहासिक मोड़ आय, जऊन म छत्तीसगढ़ के संस्कृति, माटी, अउ नारी मनके सम्मान के बात करे गे हावय।
ए फिल्म के निर्माता मोहित साहू ह कहिन के- “जानकी भाग-1” सिरिफ एक फिल्म नइए, ए हमर छत्तीसगढ़ के असली पहचान आय। सबो छत्तीसगढ़वासी मन ला ए बात म गर्व होय के चाही के अब हमर माटी के फिल्म राष्ट्रीय मंच म दिखे बर जात हे। ओमन किहिन- “मैं सबो छत्तीसगढ़वासी मन ले बिनती करत हंव के अपन नजदीकी सिनेमाघर म जाके ए फिल्म ला जरूर देखव। ए हमर छत्तीसगढ़ के, हमर आत्मा के फिलिम आय।”
“जानकी” के कहानी समाज म नारी मनके असली स्थिति अउ उंकर अधिकार के बात ला बखूबी दिखाही। महतारी, बहिनी, बेटी, घरवाली अउ बहू सबो के संवेदना, संघर्ष अउ सम्मान ला ए फिल्म म जियत दिखाए गे हावय।
मोहित साहू ह कहिन – “हमर समाज म नारी मनला समान दर्जा त देथन, फेर घर के भीतर उंकर बात ला महत्व नइ मिलय। ए फिल्म म हर घर म बइठे जानकी के बात कहे गे हे, जऊन हा सबो के मन ला छूही।”
ए फिल्म छत्तीसगढ़ के संस्कृति, बोली-बानी, रहन-सहन अउ लोकजीवन ले जुड़े हे। फिल्म म भारी-भरकम बजट नइ हे, नइ त जादा वीएफएक्स के इस्तमाल, फेर कहानी के दम अइसे हे जऊन मनखे के भीतर जाके असर करथे।
मोहित साहू ह भारत भर के दर्शक मन ले अपील करत कहिन –
“हमर छत्तीसगढ़ म बने ए पहिली हिंदी फिल्म ला देखव, संगे संग आशीर्वाद अउ अपन समर्थन देवव। जब कहानी दमदार होथे, तब लागत अउ टेक्नोलॉजी के कमी नइ दिखय। जानकी भाग-1 ए बात ला साबित करही।” “जब तंय ए फिल्म देखबो, तंय अपन मन म घलो जानकी के चेहरा देख सकबे। ए फिल्म ह अपन बात कहिथे, जऊन हर घर म सुने जाना चाही। ए हम सबो के जिम्मेदारी आय के अपन माटी के फिल्म ला ऊँचाई म पहुँचबो।”
छत्तीसगढ़ म 3 करोड़ ले जियादा लोग रहिथे, हर वर्ग, जाति, धर्म के लोग मन। सबो ला ए फिल्म म अपन अपन हिस्सा देना चाही, काबर ए सिरिफ मनोरंजन नइए, ए एक सामाजिक बदलाव के सुरुवात आय। अंत म, “जानकी भाग-1” सिरिफ फिल्म नइए, ए एक भावनात्मक आंदोलन आय जऊन छत्तीसगढ़ के माटी ले उपजल हे। हर वो मनखे बर आय जऊन अपन घर के जानकी ला समझना चाहथें। ए फिल्म ला देखव, अपन समर्थन देवव अउ छत्तीसगढ़ सिनेमा ला देश म नवां पहचान देवव।
'अंजोर' छत्तीसगढ़ी समाचार
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।