हाई स्कूल अउ हायर सेकेण्डरी स्कूल परीक्षा 2025 के परिणाम जारी करे गिस। साल 2025 के हाई स्कूल अउ हायर सेकेण्डरी स्कूल के परीक्षा म नोनी मन ह अपन परचम लहराये हावय। 10वीं के परीक्षा म 80.70 परतिसत अउ 12वीं के परीक्षा म 84.67 परतिसत नोनी मन ल सफलता मिले हावय। दुनों परीक्षा म बालक के परतिसत क्रमशः 71.39 अउ 78.07 रिहिन हावय। 10वीं अउ 12वीं के प्रावीण्य सूची म कांकेर जिला के लइका ह पहिली ठऊर बनाये हावय। मुख्यमंत्री विष्णु देव साय ह सफल होए पढ़ईया मन अउ उंकर पालक ल बधाई दीस हावय अउ उंकर उज्जवल भविष्य के कामना करे हावय। कोनो कारन ले असफल रेहे वाला पढ़ईया मन ले मुख्यमंत्री ह किहिन हावय के वो फेर ले दुगुनी मेहनत अउ दुगुनी लगन के संग तइयारी करें अउ अगले परीक्षा म जरूर सफल होही।
छत्तीसगढ़ माध्यमिक शिक्षा मंडल डहर ले आयोजित हाई स्कूल सर्टिफिकेट (10वीं) के मुख्य परीक्षा म कुल तीन लाख 23 हजार 94 परीक्षा देवइया सामिल होइस रिहिस। ओमा ले एक लाख 45 हजार 141 बालक अउ एक लाख 77 हजार 953 नोनी मन हावयं। एमे ले कुल तीन लाख 21 हजार 299 परीक्षा देवइया के परिणाम घोसित करे गे। जेमा कुल दू लाख 45 हजार 913 (कुल 76.53 प्रतिशत) परीक्षा देवइया पास होइस। इही रकम ले हायर सेकेण्डरी स्कूल सर्टिफिकेट (12वीं) के परीक्षा म कुल दू लाख 38 हजार 626 परीक्षा देवइया सामिल होइस। जेमे ले एक लाख एक हजार 184 बालक अउ एक लाख 37 हजार 442 नोनी मन हावयं। एमे ले कुल एक लाख 94 हजार 906 (81.87 प्रतिशत) परीक्षा देवइया पास रिहिन।
छत्तीसगढ़ माध्यमिक शिक्षा मंडल के वेबसाइट https://cg.results.nic.in
ए मउका म विधायक रायपुर (ग्रामीण) मोतीलाल साहू, अपर मुख्य सचिव अउ माध्यमिक शिक्षा मंडल के अध्यक्ष श्रीमती रेणु जी पिल्ले, मुख्यमंत्री के प्रमुख सचिव सुबोध सिंह, स्कूल शिक्षा विभाग के सचिव सिद्धार्थ कोमल परदेशी, मुख्यमंत्री के सचिव डॉ. बसवराजु एस. माध्यमिक शिक्षा मंडल के सचिव श्रीमती पुष्पा साहू सहित माध्यमिक शिक्षा मंडल के आन सदस्य मौजूद रिहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।