CG Rajya Alankaran Award 2024: छत्तीसगढ़ राज्य अलंकरण 2024

छत्तीसगढ़ राज्य स्थापना दिवस के मउका म दे जाने वाला राज्य अलंकरण पुरस्कार 2024 येसो 6 नवंबर के दे जाही। 1 नवंबर के होवइया राज्योत्सव ह देवारी तिहार के सेती 4 नवंबर ले शुरू होवत हाबे, जेन ह 6 नवंबर तक चलही। मिले आरो के मुताबिक जेन मन ला राज्य अलंकरण पुरस्कार 2024 दे जाही, पुरस्कार पाये खातिर सूचना जारी कर दिये गे हावय। फेर अभी येकर जानकारी के औपचारिक घोसना नइ करे गे हावय। प्रदेश सरकार नेवता म येसो राज्य अलंकरण पुरस्कार 2024 प्रदान करे खातिर उपराष्ट्रपति जगदीप धनखड़ रायपुर अवइया हवय। उपराष्ट्रपति जगदीप धनखड़, राज्यपाल रमेन डेका, मुख्यमंत्री विष्णुदेव साय, उप मुख्यमंत्री अरूण साव सहित प्रदेश के सबो बड़े नेता मनके सियानी म छत्तीसगढ़ राज्य अलंकरण पुरस्कार 2024 दे जाही।

छत्तीसगढ़ राज्य अलंकरण 2024

1 शहीद वीरनारायण सिंह स्मृति सम्मान — श्री बुटलू राम माथरा
2 यति यतनलाल सम्मान —  मनोहर गौशाला, खैरागढ़
3 गुण्डाधूर सम्मान खेल — सुश्री छोटी मेहरा
4 मिनीमाता सम्मान — सतनामी महिला जागृति समिति कोहका, जिला दुर्ग
5 गुरू घासीदास सम्मान — श्री राजेन्द रंगीला 
6 ठाकुर प्यारेलाल सिंह पुरस्कार — श्री शशिकांत द्विवेदी
7 महाराजा प्रवीरचंद भंजदेव सम्मन — श्री विकास कुमार
8 पं. रविशंकर शुक्ल सम्मान — अखिल भारतीय वनवासी कल्याण आश्रम
9 पं. सुन्दरलाल शर्मा सम्मान — डाॅ. सत्यभामा आडिल
10 चक्रधर सम्मान — श्री सुधाकर रामभाऊ शेवलीकर
11 दाऊ मंदराजी सम्मान— श्री पंडीराम मंडावी
12 डाॅ. खूबचंद बघेल कृषक रत्न पुरस्कार — श्री शिवकुमार चंद्रवंशी, श्री खेमराज पटेल
13 महाराजा अग्रसेन सम्मान — श्री सियाराम अग्रवाल
14 चन्दूलाल चन्द्राकर स्मृति पत्रकारिता पुरस्कार— श्री भोला राम सिन्हा
15 चन्दूलाल चन्द्राकर स्मृति पत्रकारिता पुरस्कार— श्री मोहन तिवारी
16 मधुकर खेर स्मृति पत्रकारिता पुरस्कार— श्री मुकेश एस सिह
17 दानवीर भामाशाह सम्मान — श्री सुभाष चंद अग्रवाल
18 धन्वन्तरि सम्मान डा. मनोहर लाल लहेजा
19 श्रीमती बिलासादेवी — श्री विनोद दास
20 डाॅ. भंवरसिंह पोर्ते - श्री सोनऊ राम नेताम
21 स्व. महाराजा रामानुज प्रताप श्री सुरेन्द्र कुमार राठौर, श्री शोभा सिंह
22 पं. लखनलाल मिश्र सम्मान — श्री रामनरेश यादव
23 छत्तीसगढ़ अप्रवासी भारतीय सम्मान — श्री आनंद कुमार पांडे 
24 देवदास बंजारे स्मृति पुरस्कार— श्री भगत गुलेरी
25 किशोर साहू सम्मान — श्री प्रकाश अवस्थी
26 देवदास बंजारे स्मृति पंथी नृत्य पुरस्कार — श्री साधेलाल रात्रे
27 लक्ष्मण मस्तुरिया सम्मान — श्रीमती निर्मला ठाकुर (बेलचंदन)
28 खुमान साव — श्री दुष्यंत कुमार हरमुख
29 लाला जगदलपुरी साहित्य पुरस्कार — डा. पीसी लाल यादव
30 किशोर साहू राष्ट्रीय अलंकरण — श्री सतीश जैन
31 बैरिस्टर ठाकुर छेदीलाल सम्मान — श्री सुरेन्द्र तिवारी, श्री प्रकाश चंद्रपंत
32 वीरांगना रानी अवंतिबाई लोधी स्मृति पुरस्कार — श्रीमती अदिती कश्यप
33 माता बहादुर कलारिन सम्मान— कुमारी चित्ररेखा सिन्हा
34 पं. माधव राव सप्रे राष्ट्रीय रचनात्मकता सम्मान— श्री अतुल जैन
35 स्व. बिसाहूदास महंत सर्वश्रेष्ठ बुनकर पुरस्कार — श्री पन्नालाल देवांगन, श्री बहोरी लाल देवांगन
36 राजराजेश्वरी करूणामाता — श्री सत्यनारायण देवांगन, श्री अरूण मेहर

उप राष्ट्रपति जगदीप धनखड़ 36 विभूति मनला सम्मानित करही

राजधानी नवा रायपुर म राज्योत्सव के मउका म राज्य अलंकरण समारोह के आयोजन 06 नवंबर के करे जाही। उप मुख्यमंत्री अरूण साव ह आज राजधानी रायपुर के महंत घासीदास संग्रहालय म आयोजित प्रेस कॉन्फ्रेंस म राज्य अलंकरण समारोह म सम्मानित होए वाला विभूति के नाम के जानकारी दीस। ओमन बताइन के छत्तीसगढ़ के आने-आने क्षेत्र ले उत्कृष्ट योगदान दे वाला मनखे मन ल उप राष्ट्रपति जगदीप धनखड़ डहर ले 06 नवंबर ल 36 विभूति ल छत्तीसगढ़ राज्य अलंकरण ले सम्मानित करे जाही।

राज्यपाल रमेन डेका समारोह के अध्यक्षता करही। खास पहुना के रूप म मुख्यमंत्री विष्णु देव साय अउ विधानसभा अध्यक्ष डॉ. रमन सिंह मौजूद रइही। राज्य अलंकरण समारोह अउ राज्योत्सव के समापन समारोह म छत्तीसगढ़ के आने-आने विभूति ल उंकर उपलब्धि अउ राज्य के विकास म योगदान के खातिर राज्य अलंकरण ले सम्मानित करे जाही।

आदिम जाति कल्याण विभाग डहर ले आदिवासी पिछड़ा वर्ग के उत्थान के खातिर शहीद वीरनारायण सिंह पुरस्कार बुटलू राम माथरा ल दे जाही। सामान्य प्रशासन विभाग डहर ले दे जाये वाला अहिंसा अउ गौ रक्षा के क्षेत्र म यति यतनलाल सम्मान मनोहर गौशाला खैरागढ़, खेल अउ युवा कल्याण विभाग डहर ले खेल के क्षेत्र म उत्कृष्ट प्रदर्शन के खातिर गुण्डाधूर सम्मान सुश्री छोटे मेहरा, खेल (तीरंदाजी) के क्षेत्र म उत्कृष्ट प्रदर्शन के खातिर महाराजा प्रवीरचंद भंजदेव सम्मान विकास कुमार ल दे जाही। इही रकम ले महिला अउ बाल विकास विभाग डहर ले महिला उत्थान के क्षेत्र म मिनीमाता सम्मान श्रीमती पार्वती ढ़ीढ़ी, महिला मन म वीरता, शौर्य, साहस अउ आत्मबल ल सशक्त बनाये के खातिर वीरांगना रानी अवंतिबाई लोधी सुरता पुरस्कार श्रीमती अदिती कश्यप अउ महिला मन के उत्पीड़न के खिलाफ संघर्ष, नारी उत्थान के खातिर महतारी बहादुर कलारिन सम्मान कुमारी चित्ररेखा सिन्हा, आदिम जाति कल्याण विभाग डहर ले सामाजिक चेतना अउ दलित उत्थान के क्षेत्र म गुरू घासीदास सम्मान राजेन्द्र रंगीला (गिलहरे), सहकारिता विभाग डहर ले सहकारिता के क्षेत्र म ठाकुर प्यारेलाल सम्मान शशिकांत द्विवेदी ल दे जाही।

इही रकम ले सामान्य प्रशासन विभाग डहर ले सामाजिक, आर्थिक, शैक्षणिक क्षेत्र म उल्लेखनीय बुता के खातिर पंडित रविशंकर शुक्ल सम्मान उमेश कच्छप, संस्कृति विभाग डहर ले हिन्दी साहित्य के क्षेत्र म उत्कृष्ट बुता के खातिर पंडित सुन्दरलाल शर्मा सम्मान डॉ. सत्यभामा आडिल, संस्कृति विभाग डहर ले संगीत अउ कला के क्षेत्र म चक्रधर सम्मान पं. सुधाकर रामभाऊ शेवलीकर ल दे जाही। संस्कृति विभाग डहर ले लोककला अउ शिल्प के क्षेत्र म दे जाये वाला दाऊ मंदराजी सम्मान पंडीराम मंडावी ल दे जाही। संस्कृति विभाग डहर ले ही छत्तीसगढ़ी लोकगीत के खातिर लक्ष्मण मस्तुरिया सम्मान श्रीमती निर्मला ठाकुर (बेलचंदन) अउ छत्तीसगढ़ी लोक संगीत के खातिर खुमान साव सम्मान दुष्यंत कुमार हरमुख, कृषि विभाग डहर ले कृषि के क्षेत्र म डॉ. खूबचंद बघेल सम्मान समिलहा रूप ले शिवकुमार चंद्रवंशी अउ खेमराज पटेल ल दे जाही। सामान्य प्रशासन विभाग डहर ले सामाजिक समरसता के क्षेत्र म उल्लेखनीय बुता के खातिर महाराजा अग्रसेन सम्मान सियाराम अग्रवाल, समाज कल्याण विभाग डहर ले दानशीलता, सौहार्द्र अउ अनुकरणीय मदद के क्षेत्र म दानवीर भामाशाह सम्मान सुभाष चंद अग्रवाल, मछरी विभाग डहर ले मछरी पालन के क्षेत्र म उत्कृष्ट बुता के खातिर श्रीमती बिलासाबाई केंवटीन मछरी विकास पुरस्कार विनोद दास ल दे जाही।  

आदिम जाति कल्याण विभाग डहर ले आदिवासी मन के सेवा अउ उत्थान के क्षेत्र म दे जाये वाला भंवर सिंह पोर्ते सम्मान सोनऊ राम नेताम ल दे जाही। श्रम विभाग डहर ले श्रम के क्षेत्र म महाराजा रामानुज प्रताप सिंहदेव पुरस्कार समिलहा रूप ले सुरेन्द्र कुमार राठौर, शोभा सिंह अउ ललित कुमार नायक ल दे जाही। गृह (पुलिस) विभाग डहर ले अपराध अनुसंधान क्षेत्र म पंडित लखन लाल मिश्र सम्मान रामनरेश यादव, ग्रामोद्योग विभाग डहर ले बुनकर क्षेत्र म बिसाहूदास महंत पुरस्कार समिलहा रूप ले पन्नालाल देवांगन अउ बहोरी लाल देवांगन ल प्रदाय करे जाही। ग्रामोद्योग विभाग डहर ले बुनकर के क्षेत्र म राजराजेश्वरी करूणामाता हाथकरघा प्रोत्साहन पुरस्कार समिलहा रूप ले सत्यनारायण देवांगन अउ अरूण मेहर ल दे जाही।

संस्कृति विभाग डहर ले प्रदर्शनकारी लोककला क्षेत्र म देवदास बंजारे सुरता पुरस्कार भगत गुलेरी, संस्कृति विभाग डहर ले लोक शैली पंथी नृत्य प्रदर्शनकारी कला क्षेत्र म देवदास सुरता पंथी नृत्य पुरस्कार साधे लाल रात्रे, संस्कृति विभाग डहर ले हिन्दी-छत्तीसगढ़ी सिनेमा म रचनात्मक लेखन, निर्देशन, अभिनय, पटकथा, बनाये के क्षेत्र म किशोर साहू सम्मान प्रकाश अवस्थी, संस्कृति विभाग डहर ले ही हिन्दी-छत्तीसगढ़ी सिनेमा म निर्देशन के खातिर दे जाये वाला किशोर साहू राष्ट्रीय अलंकरण सतीश जैन ल दे जाही।

स्वास्थ्य विभाग डहर ले आयुर्वेद चिकित्सा शिक्षा अउ शोध अउ अनुसंधान के क्षेत्र म उल्लेखनीय बुता के खातिर धनवन्तरि सम्मान डॉ. मनोहर लाल लहेजा ल दे जाही। विधि अउ विधायी विभाग डहर ले विधि के क्षेत्र म उल्लेखनीय बुता बर बैरिस्टर ठाकुर छेदीलाल सम्मान समिलहा रूप ले सुरेन्द्र तिवारी अउ प्रकाश चंद्र पंत ल दे जाही। संस्कृति विभाग डहर ले देश के बाहिर सामाजिक कल्याण, मानव संसाधन विकास, कला, साहित्य या आर्थिक योगदान के क्षेत्र म उल्लेखनीय बुता के खातिर छत्तीसगढ़ अप्रवासी भारतीय सम्मान आनंद कुमार पांडे, संस्कृति विभाग डहर ले साहित्य, आंचलिक साहित्य के क्षेत्र म उल्लेखनीय बुता के खातिर लाला जगदलपुरी साहित्य पुरस्कार डॉ. पीसी लाल यादव ल दे जाही। जनसंपर्क विभाग डहर ले पत्रकरिता प्रिंट मीडिया हिन्दी के क्षेत्र म चन्दूलाल चन्द्राकर सुरता पत्रकारिता पुरस्कार भोलाराम सिन्हा, इलेक्ट्रॉनिक मीडिया (हिन्दी) के क्षेत्र म मोहन तिवारी, जनसपंर्क विभाग डहर ले प्रिंट मीडिया (अंग्रेजी) के क्षेत्र म मधुकर खेर सुरता पत्रकारिता पुरस्कार मुकेश एस. सिंह, जनसंपर्क विभाग डहर ले ही रचनात्मक लेखन अउ हिन्दी भाषा क्षेत्र म प्रदाय करे जाये वाला पंडित माधवराव सप्रे राष्ट्रीय रचनात्मकता सम्मान अतुल जैन ल दे जाही।