राष्ट्रपति द्रौपदी मुर्मु के रायपुर प्रवास, 25 अउ 26 अक्टूबर के केउ कार्यक्रम म होही सामिल

भारत के राष्ट्रपति श्रीमती द्रौपदी मुर्मु ह अपन दू दिवसीय छत्तीसगढ़ प्रवास म रायपुर अवइया हावय। मिले आरो के मुताबिक येकर संबंध म सरकार सबो जोखा मढ़ा डरे हावय।

राष्ट्रपति श्रीमती द्रौपदी मुर्मु के कार्यक्रम-

राष्ट्रपति श्रीमती द्रौपदी मुर्मु 25 अक्टूबर के मंझनिया 11.10 बजे बिसेस विमान ले स्वामी विवेकानंद एयरपोर्ट रायपुर आही। राष्ट्रपति श्रीमती मुर्मु उहां ले एम्स रायपुर जाही अउ मंझनिया 11.45 बजे ले 12.45 बजे तक एम्स रायपुर के दूसरइया दीक्षांत समारोह म बतौर मुख्य पहुना सामिल होही। येकर पाछु वो उहां ले मंझनिया एक बजे राजभवन रायपुर आही।

राष्ट्रपति श्रीमती मुर्मु राजभवन ले मंझन 3.20 बजे एनआईटी रायपुर जाही अउ उहां एनआईटी के 14वें दीक्षांत समारोह म मुख्य पहुना के रूप म सामिल होही। येकर पाछु वो उहां ले पुरखौती मुक्तांगन जाही अउ संझा 5.15 बजे ले संझा 6 बजे तक आयोजित कार्यक्रम म महतारी वंदन योजना के तहत 9वीं किश्त के रकम के बाटही। ए योजना के तहत राज्य के 70 लाख महिला मनला छत्तीसगढ़ सरकार डहर ले हरेक महीना 1000 रूपिया के आर्थिक मदद दे जात हावय। राष्ट्रपति श्रीमती मुर्मु पुरखौती मुक्तांगन म आदिवासी समुदाय के लोगन ले मुलाकात अउ गोठबात करही। येकर पाछु वो संझा 6.30 बजे राजभवन आही। राजभवन म करार कार्यक्रम के खातिर संझा 7 बजे ले 7.30 बजे तक उंकर समय आरक्षित रइही। राष्ट्रपति श्रीमती मुर्मु रतिहा भोज अउ विश्राम राजभवन म करही।

राष्ट्रपति श्रीमती द्रौपदी मुर्मु 26 अक्टूबर ल बिहनिया 9 बजे राजभवन ले प्रस्थान करके गायत्री नगर रायपुर के जगन्नाथ मंदिर जाही अउ उहां दरसन अउ आरती करे के पाछु रायपुर एयरपोर्ट जाही अउ उहां ले बिसेस हेलीकॉप्टर ले भिलाई के खातिर प्रस्थान करही। राष्ट्रपति श्रीमती मुर्मु मंझनिया 11.05 बजे ले मंझनिया 12 बजे तक आईआईटी भिलाई के चतुर्थ दीक्षांत समारोह म मुख्य पहुना के तौर म सामिल होही। राष्ट्रपति श्रीमती मुर्मु उहां ले हेलीकॉप्टर ले 12.55 बजे रायपुर एयरपोर्ट वापस आही अउ मुख्यमंत्री निवास कार्यालय सेक्टर-24 नवा रायपुर जाही अउ उहां आयोजित सम्मान भोज म सामिल होही। वो मंझन 3.30 बजे पंडित दीनदयाल उपाध्याय मेमोरियल हेल्थ साइंस अउ आयुष युनिवर्सिटी छत्तीसगढ़ नवा रायपुर जाही अउ उहां आयोजित तीसरा दीक्षांत समारोह म बतौर मुख्य पहुना सामिल होही। वो उहां ले संझा 5 बजे रायपुर एयरपोर्ट जाही अउ बिसेस विमान ले नवा दिल्ली के खातिर प्रस्थान करही।