अनिकृति, विशाल संग संजय महानंद के हास्य फिल्म 'नोनी के अनहोनी' 24 नवंबर के रिलीज होही

अंजोर.ए। होमन देशमुख प्रोडक्शन के बैनर म बने छत्तीसगढ़ी फिल्म 'नोनी के अनहोनी' 24 नवंबर के प्रदेश के सिनेमाघर म रिलीज होही। फिल्म के निर्देशन करे हाबे गौरव रत्नाकर अउ अहम किरदार म नजर आही एवरग्रीन विशाल, अनिकृति चौहान, संजय महानंद, अनिल शर्मा।

प्रोडक्शन टीम डहर ले फिल्म के प्रमोशन सरलग करे जावथे, खूबसूरत पोस्टर के संग सोशल मीडिया म गाना अउ ट्रेलर तको जारी होगे हावय। मिले आरो के मुताबिक फिल्म हास्य प्रधान हाबे। येमा एक ले बड़के एक हास्य अंदाज देखे बर मिलही।

जइसे के केहे जाथे के नोनी के अनहोनी तव ऐमा जरूर अनिकृति नोनी के संग अनहोनी होही, का अनहोनी होही ये तो सिनेमा देखे के बादे बता चलही।

नोनी के रूप म अनिकृति चौहान दिखही जेन थोकिन लंबा समय के बाद बहुत ही मजेदार फिल्म लेके आवत हाबे। अन्नी वइसे भी छॉलीवुड के बड़का सितारा हाबे, उंकर केउ फिल्म हिट होए हाबे। उहें विशाल बढ़िया कलाकार हाबे, कुछ दिन पहिली वैदेही म उंकर काम ल लोगन खूब पसंद करे करिस। सबले बड़े बात येमा संजय महानंद बहुत लंबा अंतराल के बाद बड़े भूमिका छत्तीसगढ़ी फिल्म करे हाबे। वइसे तो ओमन के असल पहिचान छॉलीवुड म हास्य के हाबे। लेकिन कुछ बछर ले ओमन भोजुपरी म जमे हाबे। संग अनिल शर्मा तको जबर भूमिका म हाबे।