अमित, रेणु जोगी गौरेला म डारिस वोट, पाटन ले लडि़स चुनाव अब 3 दिसंबर के अगोरा

अंजोर.ए। छत्तीसगढ़ विधानसभा चुनाव म अजीत जोगी के कमी ये दरी लोगन ल खलिस हाबे। जब ले छत्तीसगढ़ राज बने हाबे इहां के राजनीति म जोगी के भूमिका अहम माने जाए। जब ओमन कांग्रेस म रिहिस त, अउ अपन अलग जोगी कांग्रेस बनाये के बाद तको उंकर नीति म तूती बोलय। जोगी के गड़ माने जाने वाला गौरेला पेड्रा मरवाही क्षेत्र म आज भी सक्रिय कार्यकर्ता हाबे, इहंचे ले जोगी परिवार वोटिंग तको करिस हाबे। अमित जोगी अउ रेणु जोगी गौरेला ले वोटिंग करे फोटो साझा करे हाबे।

ये दरी के चुनाव म जोगी कांग्रेस बर सीट लाना बहुत थोकन मुश्किल होगे हावय, काबर के बहुत झिन कार्यकर्ता मन अजीत जोगी के जाये के बाद कांग्रेस म फेर वापसी कर ले रिहिस, कांग्रेस के सरकार बनते ही लोगन मन फेर अपन मूल पार्टी कोति लहुंटे म लाभ देखत रिहिस। वइसे जेन मन नवा रूप ने फेर पार्टी म सामिल होइन जोर सोर अपन क्षेत्र म काम करत रिहिस अब कुछ सीट तो आये के संभावना हाबे। अमित जोगी के कार्य कुशलता ल देखे जाए तो ओमन ये दारी विपक्ष के भूमिका निभाये हाबे, काबर के मुख्य विपक्ष पार्टी भाजपा ह तो केवल केन्द्र के काम करत रिहिस। स्थानीय मुददा ल अमित जोगी जोर सारे ल उठावत रिहिसे। अब सबो भविस के फइसला 3 दिसंबर के खुलही।