पशु मनके सड़क म आये ले रोके के कार्यवाही जारी

अंजोर.रायपुर। मुख्य सचिव अमिताभ जैन के अध्यक्षता म इहां मंत्रालय महानदी भवन म प्रदेस के आने-आने सड़क म पशु मन के सड़क म आने ले होए वाला दुर्घटना मन ल रोके के खातिर करे  जात सघन अभियान के राज्य स्तरीय समीक्षा करे गिस। बइठक म मुख्य सचिव ह जिलेवार सड़क म पशु मन के आने ले रोके के खातिर के जा रेहे सघन कार्यवाही के जानकारी लिस। पशु मन के सड़क ले ले जाके गौठानों, कांजी हाउस अउ गौशाला ल सुरक्षित रखे के खातिर समुचित बेवस्था के तको समीक्षा करिस। 

मुख्य सचिव ह  अधिकारी मनसे सड़क ले पशु मन के रोके के खातिर आने-आने स्तर म मिले शिकायत के निराकरण के दिशा म के जा रेहे कार्यवाही के विस्ता्र ले समीक्षा करिस। ए संबंध म ओमन  अधिकारी मनको सड़क ले हटाये गे पशु मन के संख्या के संधारण अउ अइसे गांव जिहां ले ज्यादातर पशु सड़क म आते हावय उहां के गरूवा पोसइया मन के समझाईश दे अउ आने-आने स्तर म जरूरी सुझाव ले के निर्देश दे हावयं।

मुख्य सचिव ह पुलिस  अधिकारी मनको सड़क म पशुजन्य दुर्घटनाओं म जरूरी कार्यवाही करत होइस अइसे दुर्घटनाओं के विस्ता्र ले विवेचना करे के निर्देश दे हावय। बइठक म गौशाला के स्थिति अउ नवा गौशालाये खोले के प्रगति के तको समीक्षा के गे। इही रकम ले ले गउठान म सूखा ठऊर  अउ सूखा पहुंच रसता के प्रगति अउ कांजी हाउस, गउठान म रखे पशु मन पशु मालिक ले जुर्माना, पशु मन के देखरेख अउ शिकायत के निराकरण के स्थिति के समीक्षा करिस। बइठक म ग्रामीण अउ नगरीय क्षेत्र म पर्याप्त काऊ केचर गाड़ी के उपलब्धता सुनिश्चित करे के निर्देश  अधिकारी मनको दे गे हावय। इही रकम ले जिलेवार पशु मन के सड़क म आने ले रोके के खातिर शिकायत के निराकरण के प्रगति के विस्तार ले समीक्षा करे गिस। 

मुख्य सचिव ह राज्य के सबो कमिश्नर ले पशु मन के सड़क म आने ले रोके के खातिर सरलग निगरानी के बेवस्था सुनिश्चित करे के खातिर जरूरी कार्यवाही करे के निर्देश दे हावय। बइठक म कृषि विभाग के सचिव डॉ. कमलप्रीत सिंह, पंचायत अउ ग्रामीण विकास के सचिव प्रसन्ना आर., संचालक पंचायत कार्तिकेय गोयल, संचालक पशु चिकित्सा सेवाये श्रीमती चंदन त्रिपाठी सहित संभागीय कमिश्नर, कलेक्टर, राष्ट्रीय राजमार्ग सड़क प्राधिकरण, राष्ट्रीय राजमार्ग अउ लोक निर्माण, पंचायत अउ ग्रामीण विकास सहित आन  विभाग के अधिकारी सामिल होइस।