राष्ट्रपति ले 22 अगस्त के भेंट करही एकलव्य के 40 पढ़ईया

अंजोर.रायपुर। राष्ट्रपति श्रीमती द्रौपदी मुर्मु अउ केन्द्रीय जनजाति कार्य मंत्री अर्जुन मुंडा अउ केन्द्रीय जनजाति राज्य मंत्री श्रीमती रेणुका सिंह ले छत्तीसगढ़ राज्य म संचालित एकलव्य आदर्श आवासीय स्कूल के 40 पढ़ईया 22 अगस्त के मुलाकात करही। एकलव्य स्कूल छत्तीसगढ़ के 40 पढ़ईया पहिली बार वायुयान ले रवाना होके आज दिल्ली पहुंचिस।

राष्ट्रपति, केन्द्रीय जनजाति कार्य मंत्री अउ केन्द्रीय जनजाति राज्य मंत्री एकलव्य आदर्श आवासीय स्कूल के पढ़ईया मन ले नवा दिल्ली म मुलाकात के बखत जनजाति विकास, जनजाति गौरव दिवस, उंकर शैक्षणिक विकास के प्रगति म गोठबात करके उंकर विचार जानही।  

एकलव्य स्कूल के पढ़ईया पहिली बार वायुयान ले यात्रा करे के सेती बहुत ही उत्साहित हावयं अउ वो खुद के बहुत ही सौभाग्यशाली समझ रिहिन हावयं के ओला हवाई यात्रा के संग भारत के सर्वोच्च पदासीन राष्ट्रपति ले मिले के मउका मिले हाबे। लइका ह किहिन के ये हमर जिनगी के अविस्मरणीय दिन होही। एकलव्य आदर्श आवासीय स्कूल के सबो पढ़ईया मन ह वायुयान ले पहिली बार यात्रा के खातिर प्रदेस के मुख्यमंत्री भूपेश बघेल, आदिम जाति अउ अनुसूचित जाति मंत्री मोहन मरकाम, विभाग के सचिव डी.डी. सिंह अउ आयुक्त श्रीमती शम्मी आबिदी के प्रति आभार व्यक्त करिन हावय।