व्यापम म भर्ती माफिया के संदेह : पूर्व आईएएस अउ भाजपा नेता ओपी चौधरी

अंजोर.ए। छत्तीसगढ़ सरकार कोति ले सहायक शिक्षा भरती खातिर विज्ञापन जारी करे गे रिहिस अउ येकर सरी जिम्मा व्यापम ल दे गे रिहिस। सीजी व्यापम ह येकर परीक्षा ले के बाद परिणाम तको जारी करे हावय। परीक्षा के बखत ले ही व्याकपम कई वजह ले लोगन के विरोध के झेलते हावय। पहिली तो आवेदन म खेल तमासा ओकर बाद परीक्षा म सवाल के गलती अब एक अऊ बड़का बात सामने आये हावय के अभ्यर्थी मनके उपस्थिति ले जादा संख्या परिणाम वाला मनके हाबे। एमा खेल हाबे येला तो व्यापम जाने, लेकिन जेन मुताबिक गलती होवथे संदे‍ह ल मजबूती तो जरूर मिलत हाबे।

इही ओढ़र म सोशल मीडिया म कई गोठ होवथे बकायदा सबूत के संग। पूर्व आईएएस अउ भाजपा नेता ओपी चौधरी तको सोशल मीडिया म व्यापम के परिणाम ल साफर करत कहे हावय के सहायक शिक्षक परीक्षा खातिर 10 जून के विज्ञापन म स्वयं व्यापम ह 1,46,176 अभ्यर्थी के उपस्थिति बताये रिहिस। अब 2 जुलाई के जारी परिणाम म 1,46,275 अभ्यर्थी हो गे हावय। जेमा 99 जादा कइसे होगे, इही हर तो भर्ती म माफिया के संदेह ल मजबूत करत हाबे।