अंजोर.रायपुर। मुख्यमंत्री भूपेश बघेल के पहल म छतीसगढ़ के स्कूल म बढि़या आधारभूत ढांचा के संग शिक्षा के गुणवत्ता बढ़ाये, सीनियर सेकेंडरी स्तर म विज्ञान अउ वाणिज्य के शिक्षा के प्रोत्साहन दे के खातिर वर्ल्ड बैंक ह छत्तीसगढ़ ल लगभग 2460 करोड़ रूपिया के रकम मंजूर करे हावय। ए परियोजना ले गरीब अउ कमजोर वर्ग ले आने वाला लगभग 40 लाख पढ़ईया लाभान्वित होही।
जानबा होवय के छत्तीसगढ़ म स्कूली शिक्षा के मजबूत बनाये के संग ही गरीब वर्ग के प्रतिभावान पढ़इया लइका ल गुणवत्तापूर्ण शिक्षा उपलब्ध कराये के खातिर स्वामी आत्मानंद इंग्लिश अउ हिंदी माध्यम म उत्कृष्ट स्कूल सुरू करे जात हावयं। येकर अलावा शिक्षा के क्षेत्र म केऊ नवाचारी पहल तको करे जात हावयं। सबो स्तर म शिक्षा के पहुंच सुनिश्चित करे, सीनियर सेकेंडरी स्तर म साइंस अउ कॉमर्स के बाढ़त मांग ल धियान म रखत छत्तीसगढ़ एक्सीलरेटेड लर्निंग फॉर नॉलेज इकोनॉमी ऑपरेशन (चाक) परियोजना सुरू करे गे हावय। ए परियोजना के माध्यम ले दूरस्थ क्षेत्र म स्थित स्कूल म तको अध्ययन-अध्यापन के बढि़या सुविधा उपलब्ध कराये जात हावय।
इही कड़ी म वर्ल्ड बैंक के मदद ले राज्य के माध्यमिक स्कूल मन म विज्ञान अउ वाणिज्य शिक्षा के प्रोत्साहित करने, विज्ञान अउ गणित शिक्षक मन के संख्या म बड़वार के संग-संग प्रयोगशाला म जरूरी बुनियादी नेव ल मजबूत बनाये दूरस्थ ठऊर मन ले पढ़ाई के खातिर आने वाला पढ़इया लइका के खातिर घर के व्यवस्था, स्कूल म पढ़इया लइका के नामांकन दर बढ़ाये अउ गुणवत्तायुक्त शिक्षा के खातिर प्रोजेक्ट तइयार करे गे हावय।
600 मॉडल स्कूल के विकास अउ संचालन म मिलही मदद
वर्ल्ड बैंक के ए परियोजना ले कक्षा 1 ले 12वीं तक के लगभग 600 मॉडल स्कूल के विकसित अउ संचालित करे म मदद मिलही अउ माध्यमिक स्तर म विज्ञान अउ वाणिज्य के शिक्षा के प्रोत्साहन मिलही। स्कूल म प्रशिक्षित शिक्षक, मजबूत अगुवई अउ प्रबंधन सीखे के खातिर पर्याप्त बुनियादी सुविधा दे जाही। परियोजना ले कोविड-19 के बखत लर्निंग लॉस म कमी आही। परियोजना ले अध्यापक के प्रशिक्षण ले शिक्षक मन के कक्षा म अध्यापन के क्षमता बढि़या होए के संग ही पढ़इया लइका ल विषय-वस्तु ल सीखे के क्षमता बाढ़ही। ए परियोजना ले छत्तीसगढ़ म तेजी ले बाढ़त सेवा क्षेत्र म युवा मन के खातिर रोजगार के मउका बढ़ही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।