टी एस सिंहदेव बनिस छत्तीसगढ़ के उप मुख्यमंत्री, विधानसभा चुनई बर दिल्ली म होइस बइठका

अंजोर.नई दिल्ली। छत्तीसगढ़ कांग्रेस के बड़का नेता अउ स्वास्थ्य मंत्री टी एस सिंहदेव जी ल छत्तीसगढ़ शासन के उप मुख्यमंत्री नियुक्त करे गे हावय। हालाकिं ये चुनावी बछर आए सरकार के पांच ही महीना बाचें हावय। टी एस सिंहदेव अउ भूपेश बघेल के बीच इही बात ह भाजपा के मुद्दा रिहिस, ओमन घेरीबेरी अड़ई बछर के गोठ करके चु‍टकी लेवय, जेमा अब विराम लगगे।

ये बड़का घोसना तब होइस जब अवइया चुनई ल लेके कांग्रेस पार्टी के बइठका दिल्ली म होवत रिहिस, जेमा छत्तीसगढ़ के सबो बड़का नेता जुरियाये रहिस। ये मउका म कांग्रेस अध्यक्ष मल्लिकार्जुन खरगे, जननेता राहुल गांधी ल कांग्रेस मुख्यालय, नई दिल्ली म मुख्यमंत्री भूपेश बघेल, प्रदेश कांग्रेस अध्यक्ष मोहन मरकाम सहित सबो बड़का नेता मनके संग अवइया विधानसभा चुनाव ल देखत गोठबात करिस।

ये मउका म मुख्य रूप ले संगठन महासचिव के सी वेणुगोपाल, छत्तीसगढ़ प्रभारी कुमारी सैलजा, सह प्रभारी डॉ चंदन यादव, सप्तगिरी उल्का, विजय जांगिड़ उपस्थित म छत्तीसगढ़ कांग्रेस के बड़का नेता अउ स्वास्थ्य मंत्री टी एस सिंहदेव जी ल छत्तीसगढ़ शासन के उप मुख्यमंत्री नियुक्त करे गिस। मंत्री टी एस सिंहदेव प्रदेश ल उप मुख्यमंत्री बने म प्रदेश के सबो बड़का नेता मनके संग कार्यकर्ता मन तको बधाई पठोवय हाबे।