अंजोर.सिनेमा। कलाकारी के दुनिया घलोक कोनो अजुबा ले कम नइये। कोन कहां ले आके उदूप ले लोकप्रियता के सरग ल अमर दिही कोनो नी जाने। अऊ जब लोगन के नजर परथे ओ हा सुपरस्टार हो जाये रिथे। फेर हा ये, कोनो एक दिन या रात के बात नोहय, मनखे के मेहनत अउ लगन के धिरज ले साकार होथे। हम बात करत हन आज के मल्टी टैलेंटेड छत्तीसगढ़िया अमलेश नागेश के बारे म, जेन आज छत्तीसगढ़ी कामेडी के पर्याय बनगे हावय। अमलेश नागेश के बारे एक बात साफ तौर म केहे जाथे के अमलेश ल कोना बनाये नइये ओमन खुद बने हावय अपन मल्टी टैलेंटेड के दम म।
आज यानी 19 मार्च के हमर मल्टी टैलेंटेड छत्तीसगढ़िया कोयतुर अमलेश नागेश के जनमदिन हावय। मिले जानकारी के मुताबिक अमलेश नागेश के जनम छत्तीसगढ़ राज्य के राजधानी रायपुर के पूर्व दिशा के वनांचल जिला गरियाबंद के गांव कामराज, विकासखंड छुरा म 19 मार्च 1993 म होइस।
आदिम संस्कृति अउ परंपरा के बीच पले-बढ़े आदिवासी युवा म अइसन प्रतिभा के होना सिरतोन म बुढ़ादेव के किरपा आए। जंगल झाड़ी के बीच रहइया अमलेश नागेश ल अपन समाज ले गजब मया हाबे इही सेती तो ओमन अपन नाम के संग कोयतुर तको लिखथे। आरूग माटी के उपजन-बाढ़न लइका के भीतर के कला आज दुनिया म सोर बगरावत हावय, ओमन आज के सोशल मीडिया म मल्टी टैलेंटेड छत्तीसगढ़िया हीरो के रूप म जन-जन म नाव गमाये हाबे। हमर ‘अंजोर’ टीम अउ जम्मो पाठक मन कोति ले छत्तीसगढ़ी कामेडी के पर्याय भाई अमलेश नागेश कोयतुर ल जनमदिन के गाड़ा गाड़ा बधाई... जय सेवा, जय छत्तीसगढ़।
अमलेश नागेश के बारे में पूरा जानकारी:-
- पूरा नाम- अमलेश नागेश कोयतुर
- जन्मतिथि- 19 मार्च 1993
- निवास- ग्राम कामराज, विकासखंड छुरा, जिला गरियाबंद छत्तीसगढ़
- विधा- अभिनय, लेखन, निर्देशन, फोटोग्राफी
- टेग लाइन- यूट्यूबर, इंस्टास्टार
अमलेश नागेश के लोकप्रिय किरदार:-
- बड़े
- छोटे
- घुंघरू
- भैरा कका
- बाबू
- अम्मा
- बीड़ू
- डाक्टर बाबू
- बैगा
- परोसिन
अमलेश नागेश कोयतुर के परिवारिक जानकारी:-
- अमलेश नागेश गांव म ह अपन माता-पिता, भाई-बहन, पत्नी अउ लइका मनके संग संयुक्त परिवार म ग्रामीण परिवेश म रिथे।
- अपन आदिम संस्कृति ओला गजब मया हाबे, जन-जंगल-जमीन बर जूझे म अगुवा रिथे।
- गांव के हवा-पानी म जीना, माटी संग मितानी अउ सादा जीवन ही अमलेश नागेश के पहचान आए।
अमलेश नागेश के सोशल मीडिया लिंक:-
अमलेश नागेश कॉमेडी वीडियो:-
- अमलेश नागेश के सबोच वीडियो वायरल होथे। अमलेश के नया नया वीडियो देखे बर उंकर चैनल म आव
अमलेश नागेश फिल्म:-
- बेनाम बादशाह
- ले सुरू होगे मया के कहानी
- डार्लिंग प्यार झुकता नही
- टीना टप्पर
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।