छत्तीसगढ़ म 1 अप्रैल ले सुरू होही ग्रामीण परिवार के सामाजिक-आर्थिक सर्वे, मुख्यमंत्री भूपेश बघेल ह मुख्य सचिव ल पंचायत अउ ग्रामीण विकास विभाग ल तइयारी के दीस निर्देश

अंजोर.रायपुर। मुख्यमंत्री भूपेश बघेल के निर्देश म छत्तीसगढ़ म 1 अप्रैल 2023 ले ग्रामीण परिवार के सामाजिक अउ आर्थिक सर्वे सुरू होही। मुख्यमंत्री बघेल ह मुख्य सचिव के पंचायत अउ ग्रामीण विकास विभाग के माध्यम ले सर्वे के तइयारी तुरते सुरू करे के निर्देश दे हावयं। ओमन सर्वे दल के गठन, जरूरी प्रशिक्षण, सर्वे म सामिल हितग्राही मूलक योजना मन के नाम, सर्वे प्रपत्र के प्रारूप अउ सर्वे के बखत मिले जानकारी, फोटोग्राफ्स ऑनलाइन अपलोड करे के तइयारी करके सर्वे के खातिर कार्ययोजना 20 मार्च 2023 तक प्रस्तुत करे के खातिर निर्देशित करिन हावय।

सर्वे म पाछु 12 साल के बखत म केंद्र अउ राज्य सरकार के आने-आने विकास अउ हितग्राही मूलक योजना मन के क्रियान्वयन ले ग्रामीण परिवार के आर्थिक-सामाजिक जिनगी म होइस प्रभाव के जानकारी सकेले जाही। येकर ले भावी योजना मन अउ नीति के बनाये म मदद मिलही अउ चिन्हित पात्र परिवार ल सरकारी योजना मनके फायदा देवाये म मदद मिलही।

जानबा होवय के मुख्यमंत्री भूपेश बघेल ह विधानसभा म साल 2011 ले देश म जनगणना नइ होए के उल्लेख करत छत्तीसगढ़ म सर्वे कराये के घोसना करे रिहिस, जेकर सुरू 1 अप्रैल 2023 ले होवत हावय।