हरदिहा साहू समाज के सामाजिक आदर्श बिहाव म सामिल होइस मुख्यमंत्री भूपेश बघेल, 108 नवविवाहित जोड़ी ल आसिस देवत समाज के बुता ल गजब सहराइस

हरदिहा साहू समाज के सामाजिक आदर्श बिहाव म सामिल होइस मुख्यमंत्री भूपेश बघेल

अंजोर.रायपुर। छत्तीसगढ़ हरदिहा साहू समाज रायपुर परिक्षेत्र डहर ले सा‍माजिक आदर्श बिहाव समारोह के आयोजन ग्राम डूण्डा‍ के हाई स्कूल परिसर म 10 फरवरी के करे गे रिहिस। ये मउका म माई पहुना के रूप प्रदेस के मुख्यमंत्री दाऊ भूपेश बघेल, पगरइती करिस गृह मंत्री ताम्रध्वज साहू अउ खास पहुना रिहिस विधायक रायपुर ग्रामीण सत्यनारायण शर्मा, विधायक रायपुर दक्षिण बृजमोहन अग्रवाल, विधायक रायपुर उत्तर विकास उपाध्याय, पूर्व विधायक नंदकुमार साहू, हरदिहा साहू समाज के प्रदेस अध्यक्ष त्रिलोकी साहू, अध्यक्ष जिला सहकारी केन्द्रीय बैंक मर्यादित पंकज शर्मा उक के गरिमामयी उपस्थिति म बिहाव संपन्न होइस।

ये मउका म माई पहुना प्रदेस के मुखिया दाऊ भूपेश बघेल ह अपन विचार रखत किहन के मैं मुख्यमंत्री होए के नाते हर समाज के कार्यक्रम म जाथव फेर साहू समाज के कार्यक्रम म आये ले अलगेच अपनापन होथे। जेन आदर्श बिहाव के परंपरा हरदिहा साहू समाज सुरू करे हावय, ओ निश्चित रूप ले सहाराये के लइक हावय। मैं समाज बर हर संभव मदद दे खातिर तइयार हवं, समाज के सियान मनके जमीन के मांग हावय त ओमा प्रस्ताव बनाके देवा हम जगह भी देबो अऊ भवन बनाये खातिर तगड़ा पइसा तको देबो। मुख्यमंत्री भूपेश बघेल ह 108 नवविवाहित जोड़ी ल मंच ले मया आसिस देवत सुघ्घर आयोजन बर समाज ल बधाई दीस।

कार्यक्रम के पगरइत गृह मंत्री ताम्रध्वज साहू किहिन के हमर साहू समाज आदर्श विहाव के जेन रद्दा देखाइस ओला अब आन समाज तको अपनावत हावय। ये बात अऊ सहराये के लइक हावय के छत्तीसगढ़ हरदिहा साहू समाज ह अपन बेटी-बेटा के बिहाव ल घर म नइ करके आर्दश रूप म सा‍मूहिक‍ बिहाव करावत हावय। अइसन सामाजिक‍ आदर्श बिहाव के फइसला लेवइया हमर प्रदेस का, देस म तको कोनोच समाज म नइये। ये सेती हरदिहा साहू समाज ल बहुत-बहुत बधाई। श्री साहू ह किहिन के कुछ सामाजिक कुरीति मनला तको हमन ला समाज ले दुरिहाना हावय, जेमा बैपारी मनके जादा मुनाफा होथे अऊ घरवाले मनला उपराहा आर्थिक‍ मार झेले बर परथे। अइसन कुरीति अउ बुराई ल सबो ल जुरमिलके हटाना हावय। संगे-संग अपन समाज अउ संगठन ल मजबूत बनाये बर लोगन ले जुड़ना हावय, जतके जादा लोगन मन समाज अउ संगठन म जुड़ही ओतके मजबूती मिलही।

ये मउका म पूर्व मंत्री अउ रायपुर दक्षिण के विधायक बृजमोहन अग्रवाल तको नवविवाहित जोड़ी मनला सुभकामना देत किहिन के साहू समाज एक अइसे समाज हावय जेन संगठित हावय। ये एक मिसाल हावय प्रदेस म, बिहाव ले लेके आन सबो कार्यक्रम बर समाज म जुरमिलके काम होथे।

हरदिहा साहू समाज के सामाजिक आदर्श बिहाव म सामिल होए जम्मो पहुना मनके सुवागत करत रायपुर परिक्षेत्र के अध्यक्ष डेरहा राम साहू ह अपन सुवागत भासन म किहिन के हमन हरेक बछर सामूहिक बिहाव करथन फेर हमन ला जगह के बहुत परेसानी होथे। शासन-प्रशासन के सहयोग मिलथे, लेकिन स्वयं के नाम जमीन नइ होए के सेती भवन अउ मंडप ल अस्थायी रूप म बनाये ल परथे। ये मउका म ओमन आन सामाजिक समस्या कोति ले प्रदेस के मुखिया ल आरो कराइन।

सामाजिक आदर्श बिहाव म रायपुर विकास प्रधिकारण के सदस्य अउ समाज के सलाहकार मुकेश साहू, सचिव भागीरथी साहू, सह सचिव दाऊलाल साहू, कोषाध्यक्ष धनुष साहू उपाध्यक्ष हरीशचंद साहू, पुनीत राम साहू, गजाधर साहू, मुकुंद साहू, मोहन साहू, लखन साहू, हेमंत साहू, गोविंद साहू, लक्ष्मीनारायण साहू, विनय साहू, गज्जू साहू, चोवाराम साहू, नरेन्द्र साहू, गौतम साहू, ललित साहू, टीकम साहू, तिरथ साहू, मनोज साहू, नागेश साहू, कार्यक्रम संचालक किरण प्रकाश साहू, मनोहर साहू सहित हरदिहा साहू समाज के महिला मंडल, सबो ग्राम प्रमुख अउ नव युवक मंडल के पदाधिकारी मन तको विशेष रूप ले उपस्थित रिहिस।