छत्तीसगढ़ पुलिस राज्य स्तरीय खेलकूद प्रतियोगिता के समापन म शामिल होही मुख्यमंत्री भूपेश बघेल

अंजोर.रायपुर। मुख्यमंत्री भूपेश बघेल 15 फरवरी के छत्तीसगढ़ पुलिस राज्य स्तरीय खेलकूद प्रतियोगिता के समापन समारोह म सामिल होही। समापन समारोह के आयोजन बुधवार 15 फरवरी के संझा 4.30 बजे पी.टी.एस. माना कैंप, रायपुर म करे जाही। समापन समारोह म खास पहुना के रूप म गृहमंत्री ताम्रध्वज साहू अउ संसदीय सचिव विकास उपाध्याय तको उपस्थित रइही।

ये पहिली बार हावय जब छत्तीसगढ़ म आल इंडिया पुलिस स्पोर्ट्स मीट के तर्ज म तीन दिवसीय छत्तीसगढ़ पुलिस राज्य स्तरीय खेलकूद प्रतियोगिता के आयोजन करे गिस। छत्तीसगढ़ के स्थानीय खेलकूद के बढ़ावा दे के खातिर प्रतियोगिता म छत्तीसगढ़िया ओलंपिक के दू खेल रस्सा-कसी अउ गेंडी दौड़ के तको सामिल करे गे रिहिस। प्रतियोगिता म छत्तीसगढ़ के सबो जिला के पुलिस अउ सबो बटालियन के जवान अउ अधिकारी सामिल होइस।

मुख्यमंत्री भूपेश बघेल समापन मउका म प्रतियोगिता के विजेता खिलाड़ी के पुरस्कार बाटही। समापन मउका म छत्तीसगढ़ पुलिस के फेंसिंग टीम, कराटे टीम, पुलिस डॉग अउ अश्व दल के डहर ले बिसेस प्रस्तुति तको दे जाही।