राजभवन के आड़ म अपन आरक्षण विरोधी साजिश बंद करें भाजपा

अंजोर.रायपुर। छत्तीसगढ के राजधानी रायपुर के साइंस कॉलेज मैदान म आज प्रदेश म आरक्षण बिल ल राजभवन म अटाकाये राखे विरोध म प्रदेश कांग्रेस कोति ले जन अधिकार महारैली के आयोजन करे गे रिहिस। ये मउका म प्रदेश के मुखिया भूपेश बघेल किहिन के आज जइसे अपन एकजुटता ले जन अधिकार महारैली म अपन उपस्थिति दर्ज करके भाजपा ल संदेश दे हाव के राजभवन के आड़ म अपन आरक्षण विरोधी मंसूबा सफल करे के साजिश बंद करें। ये मउका म छत्तीसगढ़ के सबो मंत्री विधायक मनके अलावा बड़ संख्या म कांग्रेस कार्यकर्ता मन जुरियाए रिहिन।