मामूली झगरा म हत्या के आरोपी 24 घंटा म पहुंचिस जेल

मामूली झगरा हत्या के आरोपी ल 24 घंटा म पहुंचिस जेल

अंजोर.गरियाबंद। सिटी कोतवाली गरियाबंद क्षेत्र के गांव कुर्रूभाठा म दू दारूहा साथी आपस म दारू के नशा म मामूली झगरा के चलत एक साथी ह आन  साथी ल चाकू ले प्राणघातक हमला करके निर्मम हत्या कर दीस। सिटी कोतवाली गरियाबंद म सूचनाकर्ता घनश्याम ध्रुव पिता स्व.जीवन लाल ध्रुव उमर 35 साल निवासी गांव कुर्रूभाठा थाना अउ जिला गरियाबंद ह रिपोर्ट दर्ज कराइन के इंकर भाई नूतन ध्रुव ल हाई स्कूल कुर्रूभाठा म रतिहा राकेश ध्रुव ह चाकू मारके हत्या कर दे हावय के रिपोर्ट म सिटी कोतवाली गरियाबंद म मर्ग क्रमांक 09/2023 धारा 174 जा०फौ० कायम करे गिस। जेकर बाद ASP चंद्रेश ठाकुर, SDOP पुष्पेंद्र नायक अउ TI गरियाबंद निरीक्षक राकेश मिश्रा डहर ले टीम के संग घटना जगह निरीक्षण करके मउका ले लहू लगे लोहा के धारदार बटन वाला चाकू अउ फारेंसिक साक्ष्य के एकत्रित करे गिस अउ सिटी कोतवाली गरियाबंद म अपराध क्रमांक 12/2023 धारा 302 भादवि दर्ज करे गिस।

मामला गंभीर प्रकृति के होए ले जिला के आला  अधिकारी मनला आरो कराइन। जिला गरियाबंद के पुलिस कप्तान उप पुलिस महानिरीक्षक अउ वरिष्ठ पुलिस अधीक्षक अमित तुकाराम काम्बले के दिशा-निर्देश, अकताहा पुलिस अधीक्षक चन्द्रेश ठाकुर के मार्गदर्शन, अनुविभागीय अधिकारी पुलिस गरियाबंद पुष्पेंद्र नायक के पर्यवेक्षण म आरोपी पता तलाश बर टीम बनाके पता तलाश के जात रिहिस। मुखबिर ह आरोपी मन के गांव कुर्रूभाठा के कुकरी नाला जंगल म छुपे होए के सूचना दे म घेराबंदी करके आरोपी राकेश ध्रुव  के हिरासत म लेके पूछताछ करे म जुर्म कबूल करके घटना समय पहने लहू लगे कपड़ा ल पेश करे म गवाह के तीर जप्त करे गिस।