गोबर बेच के लइका ल बनावथे डॉक्टर, मुख्यमंत्री किहिस बने पढ़के समाज के सेव करबे

अंजोर.रायपुर। मुख्यमंत्री भूपेश बघेल ह मेडिकल कॉलेज के पढ़ईया आलोक सिंह ले किहिन के अच्छा पढ़ई करो अउ डॉक्टर बनके समाज के सेवा करो। आलोक ह मुख्यमंत्री ले विधानसभा म मुलाकात करिस। आलोक सिंह गोधन न्याय योजना के हितग्राही मनेन्द्रगढ़-चिरमिरी-भरतपुर जिला के निवासी संतोष सिंह के सुपुत्र हावय। मुख्यमंत्री ह आलोक के मेडिकल कॉलेज के पढ़ई के खातिर एक लाख रूपिया के मदद रकम देके तुरते स्वीकृति दीस। बघेल ह आलोक के उज्जवल भविष्य के सुभकामना करिस। ए मउका म विधायक विनय जायसवाल उपस्थित रिहिस।

संतोष पशुपालक हावयं। ओमन गोधन न्याय योजना के तहत गोबर बेचके 3 लाख 25 हजार मिले  रिहिस, जेकर ले अपन सुपुत्र आलोक के राजस्थान के कोटा म नीट परीक्षा के कोचिंग कराइन। उहां ले उपयुक्त मार्गदर्शन के पाछु उंकर सुपुत्र ह मेडिकल कॉलेज प्रवेश परीक्षा ‘नीट’ पास कर लिस अउ वो आज कांकेर के मेडिकल कॉलेज म एमबीबीएस के पढ़ई करत हावयं।