फीस विनियामक समिति डहर ले एमबीबीएस, एमडी अउ एमएस के खातिर फीस के निर्धारण... जानव कतका पइसा लागही डॉक्टर बने बर

 जानव कतका पइसा लागही डॉक्टर बने बर

अंजोर.रायपुर। राज्य शासन डहर ले गठित प्रवेश अउ फीस विनियामक समिति ह शैक्षणिक सत्र 2021-22, 2022-23 अउ 2023-24 के खातिर निजी मेडिकल कॉलेज म एमबीबीएस, एमडी अउ एमएस के खातिर आखरी फीस के निर्धारण कर दे हावय। समिति ह शंकराचार्य इंस्टीट्यूट ऑफ मेडिकल साइंसेज जुनवानी, भिलाई म एमडी अउ एमएस के क्लिनिकल पाठ्यक्रम के खातिर प्रति पढ़ईया सालाना नौ लाख 98 हजार 954 रूपिया के फीस करार के हावय। उहें इंकर प्रि-क्लिनिकल/पैरा-क्लिनिकल पाठ्यक्रम के खातिर सात लाख 99 हजार 187 रूपिया के फीस करार करे गे हावय। रायपुर इंस्टीट्यूट ऑफ मेडिकल साइंसेज गोढ़ी भानसोज, रायपुर म संचालित एमडी अउ एमएस के क्लिनिकल पाठ्यक्रम के खातिर प्रति पढ़ईया प्रति साल नौ लाख 31 हजार 484 रूपिया अउ प्रि-क्लिनिकल/पैरा-क्लिनिकल पाठ्यक्रम के खातिर सात लाख 45 हजार 187 रूपिया के फीस करार करे गे हावय।

प्रवेश अउ फीस विनियामक समिति के अध्यक्ष प्रभात कुमार शास्त्री ह बताइन के राज्य के तीन निजी मेडिकल कॉलेज म संचालित एमबीबीएस पाठ्यक्रम अउ दू कॉलेज म संचालित एसएस अउ एमडी (पीजी) पाठ्यक्रम के खातिर पहिली म अंतरिम फीस करार करे गे रिहिस। तीनों मेडिकल कॉलेज के निरीक्षण अउ लेखा उक के जांच, पड़ोसी राज्य म प्रचलित फीस के दर, छत्तीसगढ़ के स्थिति, प्रति मनखे औसत आय उक तथ्य म विचार के बाद ये पाठ्क्रम खातिर आखरी फीस के निर्धारण करे गे हावय।

मिले आरो के मुताबिक पाछु 13 जनवरी के समिति के सदस्य मन चिकित्सा शिक्षा विभाग के संचालक डॉ. विष्णु दत्त, वित्त सदस्य योगेश वर्ल्यानी अउ विधि सदस्य सैय्यद अफसर अली के मौजूदगी म होए बइठक म तीन मेडिकल कॉलेज म एमबीबीएस अउ दू मेडिकल कॉलेज म एमएस अउ एमडी के खातिर शैक्षणिक शुल्क के आखरी रूप ले करार करे गे हावय। तीनों संस्थान के निर्देशित करे गे हावय के ए फीस म ही सरी शुल्क सामिल हावयं। संस्थान यूनिफॉर्म, आईडी कॉर्ड, लैबोरेटरी, सांस्कृतिक कार्यक्रम, खेलकूद, एनएसएस, भवन, फर्नीचर, उपकरण उक मद म कोनो अकताहा रकम नइ वसूली करही। पढ़ईया मन के खातिर छात्रावास अउ ट्रांसपोर्टेशन के सुविधा वैकल्पिक रइही। इंकर खातिर संस्थान के ‘नो लॉस-नो प्रॉफिट’ के आधार म शुल्क ले के निर्देश दे हावयं।

प्रवेश अउ फीस विनियामक समिति डहर ले शंकराचार्य इंस्टीट्यूट ऑफ मेडिकल साइंसेज म संचालित एमबीबीएस पाठ्यक्रम के खातिर शिक्षण सत्र 2022-23, 2023-24 अउ 2024-25 बर सालाना सात लाख 99 हजार 187 रूपिया अउ आधा साल के खातिर तीन लाख 99 हजार 593 रूपिया शुल्क के निर्धारण करे गे हावय। उहें रायपुर इंस्टीट्यूट ऑफ मेडिकल साइंसेज म प्रति साल सात लाख 45 हजार 187 रूपिया अउ आधा साल के खातिर तीन लाख 72 हजार 593 रूपिया फीस के निर्धारण करे गे हावय। बालाजी इंस्टीट्यूट ऑफ मेडिकल साइंसेज मोवा, रायपुर के खातिर शैक्षणिक सत्र 2021-22, 2022-23 अउ 2023-24 के खातिर के खातिर प्रति साल सात लाख 50 हजार 187 रूपिया अउ आधा साल के खातिर तीन लाख 75 हजार 093 रूपिया के फीस करार करे गे हावय।