फिलिम के शूटिंग के व्यस्त शेड्यूल ले साल 2022 ल अलविदा कहि छॉलीवुड

फिलिम के शूटिंग के व्यस्त शेड्यूल ले साल 2022 ल अलविदा कहि छॉलीवुड

अंजोर.सिनेमा। छत्तीसगढ़ी फिलिम अब समय के संग उद्योग के रूप म स्थापित होवत हाबे। इही सेती तो छॉलीवुड नाम के ट्रेंड तको बड़त जात हावय। हॉलीवुड अउ बॉलीवुड के बाद टॉलीवुड, ओलीवुड, छॉलीवुड जइसे क्षेत्रिय सिनेमा म साउथ, भोजपुरी, ओडिसा के बाद छत्तीसगढ़ी के खुमारी देखत ही बनत हावय। फिलिम सरलग सिनेमाघर म प्रदर्शित होवत हाबे। जतका फिलिम प्रदर्शन के लाइन म हावय ओकर ले दोगुना फिलिम के शूटिंग जारी हावय। साल 2022 म छॉलीवुड के सफलता के बात करे त कोनो भी सुपरहिट जइसे तमगा नइ पा सकिस, फेर कुछ ह सफलता के झंडा जरूर गाड़े हावय।

दिसंबर 2022 म दर्जन भर फिलिम के शूटिंग

साल 2022 के आखरी महीना यानी दिसंबर म छॉलीवुड सबले जादा व्यस्त नजर आत हावय। ए समय दर्जन भर छत्तीसगढ़ी फिलिम के शूटिंग जारी हावय। बेटा, कुख्यात, काहे के चिंता हे कका जिंदा हे, रिवाज, जंगली, ले चल हावं अपन दुवारी, संघर्ष एक जंग, मोर महादेव उक के शूटिंग जारी हावय। वैदेही, रामायण, जइसे केऊ फिलिम डबिंग स्टेज म हावय। कलाकार मन के पूरा धियान फिलिम के समय म पूरा करे म हावय। शायद इही सेती हावय के अभी कोनो बड़े कलाकार के न्यू ईयर इंवेट के घोसना नइ होइस हावय।

दिसंबर म ही सबले जादा शूटिंग होए के सेती 2022 के खास या लक्की होए ले जादा छत्तीसगढ़ के लोकेशन तको हावय। वइसने त सालभर ही खूबसूरत लोकेशन हावय, जादा बरसात अउ गरमी के छोड़। अधिकांश प्रोडक्शन टीम सितंबर के बाद के शेड्यूल लगात हावय काबर के ए समय मौसम के नजारा अउ गजब खूबसूरत होत हावय।

साल 2022 म प्रदर्शित फिल्म

2021 म कोरोना महामारी के कठिन दौर ले गुजरने के बाद 2022 कुछ राहत भरे हावय। देश-विदेश के बंद पड़े सिनेमा उद्योग ह अपन नवा ऊर्जा के संग सिनेमाघर म दस्तक दीस। ए बखत कौन-कौन सी फिलिम हिट रेहे ये कहे बजाए, उंकर सफलता के बात करत हावयं। महामारी के दौर ह लोगन के मनोरंजन के अउ तको विकल्प दे दिये, शायद ए सेती ले सिनेमाघर म सुनापन रिहिन। फिलिम ह सफलता सुवाद जरूर आन माध्यम ले चखिस। बात 2022 म प्रदर्शित छत्तीसगढ़ी फिलिम के करे त घरौंदा, नवा बिहान, संगी रे, मया 3, दुल्ह्न पिया की, मिस्ट र मजनू, रंग रंगीले, लव लेटर, चल हट कोनो देख लेही, इश्कन म रिस्क  हे, मै दीया तै मोर बाती उक देखइया के खूब मनोरंजन करिन।