महासमुंद तुमगांव रेलवे ओवर ब्रिज लोकार्पण करिन मुख्यमंत्री भूपेश बघेल

महासमुंद तुमगांव रेलवे ओवर ब्रिज लोकार्पण करिन मुख्यमंत्री भूपेश बघेल

अंजोर.रायपुर। मुख्यमंत्री भूपेश बघेल ह  प्रदेशव्यापी भेंट-मुलाक़ात कार्यक्रम के बखत महासमुंद तुमगांव रोड के रेलवे ओवर ब्रिज  के फ़ीता काटके लोकार्पण करिन। ए मउका म गृह अउ जिला के प्रभारी मंत्री ताम्रध्वज साहू, संसदीय सचिव अउ विधायक महासमुंद विनोद चंद्राकर संग रिहिस।

बहुप्रतीक्षित तुमगांव ओवरब्रिज आम जनता के खातिर गजब जरूरी रिहिस। ए रेलवे सेतु के बन जाये ले शहर वासी ल सरलग लगइया ट्रेफ़िक जाम अउ जाये म होवइया दिक्कत ले छुटकारा मिल जाही। जिला के जनता ख़ासके तुमगाँव के तनि ले अउ महासमुंद के तनि ले रोज़ अवइया-जवइया वाला जनता ल सरल,सुगम रद्दा मिलही। अभी के बेरा म रेलवे फाटक बंद के सेती जाम के स्थित बन जात रिहिस। रेलवे ओवरब्रिज बन जाये ले ओला येकर ले निजात मिलही अउ समय के तको बचत होही।

तुमगांव रेलवे ओवरब्रिज 

तुमगांव रेलवे ओवरब्रिज बन जाये ले महासमुंद के क़रीबन 35 हजार ले ज़्यादा आबादी के सुविधा मिलही। जानकारी के मुताबिक बताइन जात हावय के 40 करोड़ के लागत ले बन तइयार होही। एमे भू-अर्जन के रकम सामिल नइ हावय। ओवरब्रिज कुल लंबाई 616 मीटर अउ चौड़ाई 15 मीटर हावय। रेलवे क्रॉसिंग ले महासमुंद के तनि 294 मीटर अउ तुमगांव के तनि 248 मीटर अउ रेलवे क्रॉसिंग के लंबाई 74 मीटर हावय।