शहीद वीर नारायण सिंह ल आज उंकर शहादत दिवस के बेरा म सेवा जोहार : सुशील भोले

वीर नारायन तोर सपना ह सुफल कहाँ फेर होवत हे

बस्ती-बस्ती गांव-गांव ह भूख म आजो रोवत हे

बाना बोहे तोर सपना के मरगें फेर कतकों बलिदानी 

नांव लिखा के इतिहास म होगें सब अमर कहानी

सुंदर प्यारे खूबचंद कस बेटा जनमिन ए माटी म 

भुखहा-दुखहा बर तोरे सहीं रेंगिन सत् के परिपाटी म

आज के लइका आंखी मूंदे नीत-अनीत फेर झेलत हें

झींके छोड़ के शोषक मनला आगू डहर अउ पेलत हें

फेर ढीलाय हे जंगल म बरगे कतकों सोनाखान

का होही ए देश ल सोच के रोवत होही फेर भगवान

आज कहूं तैं इहां होते बंदूक-भाला फेर उठाते

माखन बनिया के गोदाम कस कतकों ल फेर बंटवाते

आथे सुरता जब-जब तोर आंखी ले आंसू झरथे

फेर बोहे बर तोर बाना ल भुजा तो मोर फरकथे

का होही अब काल के चिंता काकर बर हम करबो

तोरेच देखाए रस्ता म जिनगी भर अब रेंगबो

रोटी खातिर फेर फांसी के डोरी चूमे बर परही

तभे तो घपटे अंधियारी के छाती ल सुरूज चिरही

-सुशील भोले-

9826992911