देश म कहूं ले, अपन मूल चुनाव क्षेत्र के खातिर मतदान करना अब संभव होही : मुख्य चुनाव पदाधिकारी रीना बाबा साहेब कंगाले

मुख्य चुनाव पदाधिकारी रीना बाबा साहेब कंगाले

अंजोर.रायपुर। देश म कहूं ले, अपन गृह या मूल चुनाव क्षेत्र के खातिर मतदान करना अब संभव होही। येकर खातिर भारत चुनाव आयोग ह प्रोटोटाइप रिमोट इलेक्ट्रॉनिक वोटिंग मशीन विकसित करे हावय। येकर जरिए प्रवासी मतदाता के मतदान के खातिर अपन गृह राज्य/नगर जाये के झंझट ले मुक्ति मिलही। ये जानकारी मुख्य चुनाव पदाधिकारी श्रीमती रीना बाबा साहेब कंगाले ह दीस। ओमन बताइन हावय के रोजगार, शादी, शिक्षा जइसे कई कारन ले मतदाता के आंतरिक या घरेलू प्रवासन के सेती कई बार मतदाता वोट नइ दे पात रिहिस। रिमोट मशीन के आ जाये ले वोटर टर्नआउट म सुधार आही अउ चुनाव म जादा ले जादा भागीदारी सुनिश्चित हो सकही। आयोग ह बहु-निर्वाचन क्षेत्र प्रोटोटाइप रिमोट ईवीएम के कार्यप्रणाली के प्रदर्शन करे के खातिर सबो मान्यता मिले 08 राष्ट्रीय अउ 57 राज्यीय दल ल 16 जनवरी 2023 के आमंत्रित करे हावय अउ उंकर ले 31 जनवरी 2023 तक लिखित मंतव्य दे के तको अरजी करे हावय। मिले फीडबैक अउ प्रोटोटाइप के प्रदर्शन के आधार म आयोग रिमोट मतदान पद्धति के क्रियान्वित करे के दिशा म आगू बढ़ही।