छत्तीसगढ़ी राजभाषा दिवस म मुख्यमंत्री भूपेश बघेल प्रदेसवासी मनला दीस बधाई

छत्तीसगढ़ी राजभाषा दिवस

अंजोर.रायपुर। मुख्यमंत्री भूपेश बघेल ह प्रदेसवासी ल छत्तीसगढ़ी राजभाषा दिवस 28 नवम्बर के मउका म बधाई अउ सुभकामना दीस। ओमन अपन बधाई संदेश म किहिन के “छत्तीसगढ़ी भाखा हमर पुरखौती आए, ये हर हमर अभिमान हे। नवा सरकार बने के बाद ले छत्तीसगढ़ ल इही अभिमान ला संजोए अउ आगू बढ़ाए बर हमन काम करत हन। ’जतका मान हमन ला अपन छत्तीसगढ़ महतारी उपर हे ओतके हमर मातृ भासा छत्तीसगढ़ी बर घलो होना चाही। छत्तीसगढ़ी भाखा ला हमन आत्म गौरव संग जोड़के देखबो तभे वो आघू बढ़ही।

श्री बघेल ह किहिन के छत्तीसगढ़ी भाषा हिंदी, अवधी अउ बृज भाषा के समकालीन हावय। राज्य सरकार डहर ले तीज-त्यौहार अउ पारंपरिक संस्कार ल बढ़ावा दे के संग पुरखौती के अमूल्य धरोहर के परिचय नवा पीढ़ी ले कराइन छत्तीसगढ़ी भाषा के महत्ता अउ जादा बढ़गे हावय। छत्तीसगढ़ी म बोले म संकोच करे वाला लोगन तको अब छत्तीसगढ़ी म गर्व ले बात करत हावयं। मुख्यमंत्री ह किहिन के छत्तीसगढ़ी भाषा के विकास के हमन ल आगू ले जाना हावय, येकर खातिर छत्तीसगढ़ी ल दैनिक बोलचाल के संग साहित्य सिरजन अउ प्रचार-प्रसार के भाषा बनाये के जरूरत  हावय।