योजना के क्रियान्वयन अउ काम के मॉनटरिंग बारिकी ले होवय : मुख्यमंत्री भूपेश बघेल

मुख्यमंत्री भूपेश बघेल

अंजोर.राजनांदगांव। मुख्यमंत्री भूपेश बघेल ह राजनांदगांव विधानसभा म भेंट-मुलाकात अभियान म सर्किट हाउस म  अधिकारी मनके समीक्षा बइठक लिस। ओमन किहिन के अइसे अभियान के सबले जादा लाभ ये होवत  हावय के हम जनता ले रूबरू होवत हान अउ हमन ल जन समस्या ल सउहे अउ वास्तविक जानकारी मिलत हावय। इही सेती हम येकर जल्दी  समाधान तको कर पाथन। एला सर्वोच्च प्राथमिकता दें। मुख्यमंत्री ह किहिन के ये धियान रखें के आम जनता के अपन बुता के खातिर  भटकना नी पड़े। शासन के बुता म पारदर्शिता हो। सबले जादा सरोकार ए बात ले हावय के आम लोगन के काम हो। संग ही वो संतुष्ट तको हों। ये तभी संभव होही के सरकारी योजना मन के क्रियान्वयन अउ बुता के मॉनिटरिंग सरलग हो। मुख्यमंत्री ह पैरादान के सराहना करत किहिन के एला सरलग आगू बढ़ाते राहय।

मुख्यमंत्री ह बइठक म धान खरीदी के समीक्षा करत बारदाना के स्थिति, भुगतान के जानकारी लिस।  अधिकारी मन बताइन के बारदाना पर्याप्त संख्या म हावय अउ संग ही किसान मन के भुगतान तको 48 घंटा के भीतर होवत हाबे। राजीव गांधी ग्रामीण भूमिहीन न्याय योजना के गोठबात के बखत मुख्यमंत्री ह किहिन के एक 80 साल के बुजुर्ग हितग्राही ह मोला बताइन के उंकर खाता म रकम आये हावय अउ ए योजना ले ओला लाभ होइस हावय।  उंकर चेहरे म संतोष के भाव देखके मोला राहत मिलीस। ये सुनिश्चित करें के अइसे योजना मनके जादा ले जादा लोगन ल लाभ मिले। मुख्यमंत्री ह गांव सुरगी म सड़क के स्थिति के जानकारी लिस अउ किहिन के ग्रामीण सड़क बहुत अच्छा बनना चाही। ये सर्वोच्च प्राथमिकता के बुता होना चाही। संग ही ओमन तेंदु पत्ता सकलइया के समय म भुगतान के निर्देश दिस।

ए मउका म संस्कृति मंत्री अमरजीत भगत, छत्तीसगढ़ राज्य आन पिछड़ा वर्ग क्षेत्र विकास प्राधिकरण के अध्यक्ष अउ डोंगरगांव विधायक दलेश्वर साहू, छत्तीसगढ़ अनुसूचित जाति विकास प्राधिकरण के अध्यक्ष अउ डोंगरगढ़ विधायक भुनेश्वर शोभाराम बघेल, जिला सहकारी केन्द्रीय बैंक राजनांदगांव के अध्यक्ष नवाज खान मुख्यमंत्री सचिव अंकित आनंद अउ सबो अधिकारीमन उपस्थित रिहिस।