बजट पूर्व बइठक मुख्यमंत्री भूपेश बघेल ह एनपीएस के राशि, जीएसटी क्षतिपूर्ति, कोल रॉयल्टी, अलग पेंशन निधि के मांग दोहराईस

अंजोर.रायपुर। बजट पूर्व बइठक म एक बार फेर छत्तीसगढ़ के मुख्यमंत्री भूपेश बघेल ह एनपीएस के रकम के वापसी, जीएसटी क्षतिपूर्ति के भरपाई, कोल रॉयल्टी के रकम के मांग सहित राज्य हित के आने-आने मुद्दा केंद्रीय वित्त मंत्री के आगू रखिस। दिल्ली के मानेक शॉ सेन्टर म आयोजित बजट पूर्व बइठक म केंद्रीय वित्तमंत्री सुश्री निर्मला सीतारमण के संग ही आन राज्य के वित्तमंत्री तको उपस्थित रिहिन। ए मउका म मुख्यमंत्री भूपेश बघेल ह आम बजट 2023-24 के लेके कई प्रस्ताव अउ सुझाव दिस।

छत्तीसगढ़ के मुख्यमंत्री भूपेश बघेल ह रखिस कई अहम प्रस्ताव

छत्तीसगढ़ के मुख्यमंत्री बघेल ह किहिन के राज्य शासन के कर्मचारी मन अउ उंकर परिवार के  सुरक्षित भविष्य के खातिर हमन जुन्ना पेंशन योजना लागू करे हावय। एनएसडीएल के पास 31 मार्च तक जमा 17240 करोड़ के रकम वापस करे जाये ताकि कर्मचारी मन के सामान्य भविष्य निधि म डाले जा सके। बघेल ह बताइन के राज्य शासन के अंश अलग पेंशन निधि म जमा रखे जाही, जेकर उपयोग भविष्य म पेंशनरी दायित्व ल पूरा करे के खातिर करे जाही। येकर संग ही येकर निवेश भारत सरकार अउ राज्य सरकार के प्रतिभूति म करे जाही। 

बइठक म जीएसटी क्षतिपूर्ति के 1875 करोड़ के रकम के मांग करत मुख्यमंत्री ह किहिन हमन जीएसटी क्षतिपूर्ति अनुदान के बेवस्था के जून 2022 के बाद अवइया पाँच साल के खातिर जारी रखे के अरजी करे रिहिस, फेर एमे बड़वार नइ करे गिस। येकर संग ही ओमन कोल रॉयल्टी के 4140 करोड़ के रकम राज्य के जल्दीु ट्रांसफर करे के गेलौली करिन। वहीं, ओमन केंद्रीय सुरक्षा बलों म व्यय 1288 करोड़ के रकम अउ राज्य म तैनात 4 बिसेस अउ भारत रक्षित वाहिनियों म राज्य सरकार डहर ले करे  व्यय 313 करोड़ जल्दी  दे के गेलौली करिन।  

बइठक म मुख्यमंत्री ह किहिन के छत्तीसगढ़ म कोदो, कुटकी अउ रागी (मिलेट्स) के खेती प्रमुखता ले के जात हावय। समिलहा राष्ट्र डहर ले तको साल 2023 के ‘इंटरनेशनल ईयर ऑफ मिलेट’ घोसित करे गे हावय। ओमन केंद्र ले गेलौली करिन के मिलेट्स फसल मन के बढ़ावा दे के खातिर कोदो अउ कुटकी फसल के न्यूनतम समर्थन कीमत घोसित करिन जाये। येकर संग ही बइठक म मुख्यमंत्री ह सी-मार्ट के तर्ज म विपणन केन्द्र के स्थापना के मांग के ताकि कृषि, हस्तशिल्प, लघु वनोपज जिनिस के बढ़ावा मिल सके। 

मुख्यमंत्री ह येकर अलावा मुख्य खनिजों के रॉयल्टी दर म संशोधन, बढि़या वित्तीय प्रबंधन वाला राज्य के प्रोत्साहन अनुदान, बिसेस मदद योजना के जारी रखे सहित रायपुर म इंटरनेशनल कार्गो टर्मिनल सुरू करने, केंद्रीय योजना मन म केंद्रांश बढ़ाये संबंधी सुझाव तको बइठक म दिस।

धान, बारदान के जरूरत  म तको होइस  गोठबात  

मुख्यमंत्री ह किहिन के साल 2022-23 म केंद्रीय पूल म 57 लाख मीट्रिक टन अरवा अउ 4 लाख मीट्रिक टन उसना चाउंर के लक्ष्य दे हावय। ओमन केंद्र सरकार ले 14 लाख मीट्रिक टन उसना चाउंर के लक्ष्य करार करे के अरजी करिन। येकर संग ओमन नवा जूट बारदाने के उपलब्धता सुनिश्चित कराये के मांग तको करिस।