भंडारपुरी गुरु दरसन मेला म सामिल होइन मुख्यमंत्री, मेला खातिर मिलही 10 लाख रूपिया..., अंजोर छत्तीसगढ़ी म पढ़व पूरा खबर

अंजोर.बलौदाबाजार। मुख्यमंत्री भूपेश बघेल भंडारपुरी धाम म आयोजित गुरु दरसन मेला म मुख्य पहुना के रूप म सामिल होइस। ओमन सबले पहिली गुरु गद्दी दरसन करके प्रदेस के जनता के खुसयाली के खातिर आशीर्वाद लिस। मुख्यमंत्री भूपेश बघेल ह संत शिरोमणि परम पूज्य बाबा गुरु घासीदास के जयकारा के संग मेला म आयोजित कार्यक्रम ल बरसत पानी म संबोधित करत किहिन के आज एकादशी के दिन ही गुरु बालकदास जी के राज्याभिषेक होइस। बाबा गुरुघासी दास के पुत्र गुरु बालकदास के गद्दीनसीन होए के सुरता म बरसों ले संत समागम अउ गुरुदर्शन के परंपरा ल पूरा करे जात हावय।

मुख्यमंत्री ह किहिन के हमर प्रदेस धान के कटोरा अउ किसान मन के प्रदेस हावय। किसान ठंड, गरमी अउ बरसात के चिंता करे  बगैर कड़ी मेहनत करत हावय। हमर सरकार किसान मन के उंकर मेहनत के प्रतिफल दे प्रतिबद्ध हावय। ओमन किहिन के हमर सरकार राजीव गांधी किसान न्याय योजना, गोधन न्याय योजना अउ भूमिहीन कृषि मजदूर न्याय योजना के किश्त 17 अक्टूबर के दे जात हावय।

ओमन किहिन के गुरु घासीदास बाबा के संदेश मनखे-मनखे एक समान के आगू बढ़ात सामाजिक समरसता के अउ मजबूत करिन। सरकार किसान मन, मजदूर मन के संग सबो वर्ग के आर्थिक मजबूती के खातिर सरलग बुता करत हावय। राज्य के किसान मन के धान के जतका कीमत दे जात हावय, ओतका देश के कोनो तको राज्य म नइ मिलत हावय। बाबा घासीदास ह गौवध ल रोके के जेन बुता करिन हावय, ओला भुलाया नइ जा सकय। ए मउका म ओमन संत समागम जगह म भव्य मंच बनाये अउ मैदान के समतलीकरण, गांव म सतनाम भवन, गुरुदर्शन मेला के खातिर प्रति साल 10 लाख रुपए, भंडारपुरी के अधूरे गुरुद्वारा के पूरा करे अउ भंडारपुरी ले गैतरा तक सड़क बनाये के घोसना करिस। ए मउका म सतनामी समाज के संत, राजमहंत, प्रबुद्ध जन, पंचायत अउ नगरीय निकाय के जनप्रतिनिधि गण सहित बड़ संख्या म लोगन उपस्थित रिहिस।

नगरीय प्रशासन मंत्री डॉ शिव डहरिया ह किहिन के सरकार ह जेन वादे करे  रिहिस, अधिकांश पूरा हो गे हावय। शिक्षा, रोजगार, आर्थिक सशक्तिकरण उक सहित सबो क्षेत्र म  समाज के लोगन ल आगू बढ़ाये अउ सबो समाज के सम्मान दे  के बुता सरकार डहर ले सरलग करे जात हावय।

वन मंत्री मोहम्मद अकबर ह किहिन के परंपरा के मुताबिक आज गुरु दरसन करके संत समागम म सामिल होत हावयं। सतनामी समाज अग्रणी रिहिन हावय। ओमन किहिन के सरकार सतनाम के रद्दा म चले येकर बिसेस प्रयास रहय हावय।

राजागुरु बालदास साहेब ह गुरुद्वारा भंडारपुरी म आए दरस करइया आशीर्वाद देत होइस के गुरु अमरदास ह गुरु घासीदास बाबा के मनखे मनखे एक समान के परंपरा के आगू बढ़ाइन। गुरु कोनो एक के नइ बल्कि सरी समाज के होवत  हावय। समाज के प्रगति अउ विकास के खातिर लोगन के संगठित होना जरूरी हावय। समाज के लोगन जतका जादा शिक्षित होही समाज ओतके ही जादा उन्नति करही।